ໃນວັນທີ 22 ກຸມພາ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮ່ວມ ແລະ ໂອ້ລົມຕໍ່ກອງປະຊຸມໂຍທາທິການ ແລະ ຂົນສົ່ງ ທົ່ວປະເທດ ປະຈຳປີ 2016 ເຊິ່ງທ່ານ ນາຍົກ ໄດ້ ເນັ້ນໃຫ້ ຍທຂ ເອົາໃຈໃສ່ສ້າງເສັ້ນທາງ ແຕ່ລະເສັ້ນໃຫ້ມີຄຸນນະພາບ, ເລັ່ງສ້າງເສັ້ນທາງໃຫ້ສຳເລັດ ຕາມກຳນົດເວລາເທື່ອລະເສັ້ນ ບໍ່ໃຫ້ສ້າງແບບກະແຈກກະຈາຍແຕ່ບໍ່ສຳເລັດ, ຮັບປະກັນມາດຕະຖານ ແລະ ຄຸນນະພາບ ແຕ່ຕ້ອງໃຫ້ມີການວາງແຜນໃຫ້ດີ ແລະ ຕ້ອງໃຫ້ສຳເລັດ.
ຂະແໜງໂຍທາທິການ ແລະ ຂົນສົ່ງ ເປັນຂະແໜງການປາຍແຫລມ ຂອງເສດຖະກິດແຫ່ງຊາດ ຕ້ອງໄດ້ເອົາໃຈໃສ່ສ້າງເສັ້ນທາງ ໃຫ້ບຸກທະລຸ ຈຶ່ງຈະສາມາດເປັນປາຍແຫລມໄດ້ ເຊິ່ງເສັ້ນທາງຄົມມະນາ ຄົມແມ່ນເປັນທ່າແຮງ ໃນການພັດທະນາປະເທດຊາດ, ພັດທະນາປະຊາຊົນ ເມື່ອມີເສັ້ນທາງຄົມມະນາຄົມ ທີ່ສະດວກສະບາຍ ຈຶ່ງເຮັດໃຫ້ມີການຄ້າຂາຍ ເຮັດໃຫ້ປະຊາຊົນກະຕືລືລົ້ນ ສ້າງເສດຖະກິດຕົວເອງ ໃຫ້ດີຂຶ້ນ, ສາມາດເຮັດໃຫ້ຊີວິດການເປັນຢູ່ ຂອງປະຊາຊົນດີຂຶ້ນ ແລະ ສາມາດນຳຄວາມຈະເລີນຮຸ່ງເຮື່ອງ ໄປສູ່ເຂດຊົນນະບົດໄດ້ ດັ່ງຄຳທີ່ວ່າ “ ເສັ້ນທາງມີຄວາມຈະເລີນມາ ເສັ້ນທາງມາຄວາມຈະເລີນມີ ”.
ນອກຈາກນີ້, ທ່ານ ທອງລຸນ ສີສຸລິດ ຍັງໄດ້ສະແດງຄວາມຊົມເຊີຍ ຕໍ່ຜົນງານຂອງຂະແໜງ ຍທຂ ທີ່ຍາດມາໄດ້ ໃນໄລຍະທີ່ຜານມາ ເຮັດໃຫ້ປະເທດລາວເຮົາ ເປັນປະເທດກ້າວຂຶ້ນ ສູ່ກັບການພົວພັນຄົມມະນາຄົມຂົນສົ່ງ ເຊິ່ງໃນປັດຈຸບັນ ປະເທດລາວມີເສັ້ນທາງທີ່ປູຢາງ ປະມານ 40%. ພ້ອມດຽວກັນນີ້ທ່ານ ນາຍົກ ຍັງຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ພ້ອມກັນສ້າງຄວາມໂປ່ງໃສ, ມີຄວາມຍຸຕິທຳ, ເອົາໃຈໃສ່ຄຸ້ມຄອງການມີວິໄນ ຢ່າງເຄັ່ງຄັດທາງດ້ານແຜນການ-ການເງິນ ບໍ່ໃຫ້ມີລະບົບສອງມາດຕະຖານ; ເອົາໃຈໃສຄຸ້ມຄອງຄຸນນະພາບ, ລາຄາການກໍ່ສ້າງ ໃຫ້ມີຄວາມໂປ່ງໃສ ໃຫ້ຫລາຍຂຶ້ນ ທຸກໂຄງການຄວນເຂົ້າໃນລະບົບ; ສ້າງຜັງເມືອງ ພ້ອມທັງປະຕິບັດຕາມຜັງເມືອງຢ່າງເຄັ່ງຄັດ ແລະ ເປັນລະບຽບ; ເອົາໃຈໃສ່ຍົກສູງປະສິດທິຜົນ-ປະສິດທິພາບ ໂດຍອີງໃສ່ປັດໄຈຄົນ ຕ້ອງສ້າງບຸກຄະລາກອນໃຫ້ມີຄຸນສົມບັດ, ມີນ້ຳໃຈຮັກຊາດ ຄຳນຶງເຖິງປະເທດຊາດ, ປະຊາຊົນ ແລະ ຜົນປະໂຫຍດສ່ວນລວມ; ເອົາໃຈໃສ່ສ້າງຄວາມເຂັ້ມແຂງ ໃນການຄຸ້ມຄອງ-ການບໍລິຫານ ແຕ່ຂັ້ນເທິງຈົນຮອດຂັ້ນລຸ່ມ ໃຫ້ມີຄວາມໂປ່ງໃສ, ຂາວສະອາດ ເມື່ອມີຄວາມເຂັ້ມແຂງ ການຄຸ້ມຄອງດີ ທັງພາກເອກະຊົນ ແລະ ທຸລະກິດ ກໍກ້າທີ່ຈະລົງທຶນ ໃນການກໍ່ສ້າງໂຄງການຕ່າງໆ.
ແຫຼ່ງຂ່າວ: ສຳນັກຂ່າວສານປະເທດລາວ