ວົງການບານເຕະລາວມີການປ່ຽນແປງຄັ້ງໃຫຍ່ອີກຄັ້ງ ທ່າມກາງຄວາມວຸ້ນວາຍທີ່ພວມເກີດຂຶ້ນ ໃນທີ່ສຸດ ທ່ານ ວີເພັດ ສີຫາຈັກຣ ອະດີດປະທານສະຫະພັນບານເຕະແຫ່ງຊາດລາວ ໄດ້ກັບມາຮັບຕຳແໜ່ງນີ້ອີກຄັ້ງ.
ໃນຕອນບ່າຍວັນອັງຄານ 21 ກຸມພາ 2017 ຢູ່ທີ່ຫ້ອງປະຊຸມສະຫະພັນບານເຕະແຫ່ງຊາດລາວ ບ້ານ ຫ້ວຍຫົງ ເມືອງຈັນທະບູລີ ນະຄອນຫລວງວຽງຈັນ ໄດ້ຈັດກອງປະຊຸມວິສາມັນຄົບຄະນະບໍລິຫານງານ ແລະ ພິທີມອບ-ຮັບຕໍາແຫນ່ງລະຫວ່າງ ທ່ານ ປະສາດໄຊ ພິລາພັນເດຊ ຮັກສາການປະທານສະຫະພັນບານເຕະແຫ່ງຊາດລາວ ແລະ ທ່ານ ວິເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ ເປັນກຽດເຂົ້າຮ່ວມການເປັນສັກຂີພິຍານມີ ທ່ານ ບົວລານ ສິຣິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ແສງພອນ ພົນອາມາດ ຫົວຫນ້າກົມກິລາລະດັບ ສູງກະຊວງສຶກສາທິການ ແລະ ກິລາ , ຄະນະບໍລິຫານງານ ສຕລ , ພະນັກງານ ສຕລ ຕະຫລອດຮອດສື່ມວນຊົນເຂົ້າຮ່ວມ. ທ່ານ ວິເພັດ ສີຫາຈັກຣ ຈະດຳລົງຕຳແຫນ່ງເປັນປະທານ ສະຫະພັນບານເຕະແຫ່ງຊາດລາວ ຈົນເຖິງຄົບວາລະໃນປີ 2019.
ແຫລ່ງຂ່າວຈາກ: ສະຫະພັນບານເຕະແຫ່ງຊາດລາວ