ຕາມການສຳພາດຂອງທ່ານ ໄຊຍະເດດ ວົງສາລະວັນ ຫົວໜ້າພະແນກການ-ການລົງທຶນແຂວງສາລະວັນວາາ, ນັບຕັ້ງແຕ່ປີ 1999-2016 ສາມາດດຶງດູດການລົງທຶນໄດ້ທັງໝົດ 126 ໂຄງການ ມີມູນຄ່າ 3,963 ຕື້ກວ່າກີບ, ໃນນັ້ນ ກິດຈະການທີ່ລົງທຶນໄດ້ອະນຸມັດເປັນກິດຈະການທົ່ວໄປ-ກິດຈະການສົ່ງເສີມມີທັງໝົດ 59 ໂຄງການມູນຄ່າ 2,463 ຕື້ກີບ, ການລົງທຶນໃນກິດຈະການສຳປະທານມີເນື້ອທີ່ດິນທັງໝົດ 67 ໂຄງການ ມີມູນຄ່າ 1,470 ຕື້ກວ່າກີບ
ສຳລັບໃນປີ 2015-2016 ເຫັນວ່າບໍ່ມີການລົງທຶນສູງດັ່ງທີ່ຄາດເອົາໄວ້ ຍ້ອນວ່າ ນັກລົງທຶນສ່ວນຫຼາຍສົນໃຈການລົງທຶນໃນການສຳປະທານເນື້ອທີ່ດິນປູກພືດ ແລະຕົ້ນໄມ້ອຸດສະຫະກຳ ເຊິ່ງຫຍຸ້ງຍາກໃນການຈັດສັນ
ສຳລັບປີຜ່ານມາ ກິດຈະກຳສຳປະທານທີ່ດິນໄດ້ອອກອະນຸຍາດມີ 8 ໂຄງການມູນຄ່າ 108 ຕື້ກວ່າກີບຄື: ໂຄງການປູກກ້ວຍບ້ານນາທັນ ຂອງບໍລິສັດ AB, ໂຄງການລ້ຽງງົວຂອງນິລະວັນຟຣາມ ຈຳກັດ ມີມູນຄ່າ 5.8 ຕື້ກວ່າກີບ ຢູ່ບ້ານປັນໄຕ ເມືອງສະໝ້ວຍ, ໂຄງການກໍ່ສ້າງໂຮງແຮມສາລະວັນບ້ານນາໂດນ ເມືອງສາລະວັນ ຂອງກຸ່ມບໍລິສັດຄຳໄຊຊະນະ ມີມູນຄ່າ 20 ຕື້ກີບ, ໂຄງການລ້ຽງງົວພື້ນເມືອງເປັນສິນຄ້າ ຢູ່ເມືອງສະໝ້ວຍຂອງທ່ານ ເວີນໄຊ ມູນຄ່າ 6.8 ຕື້ກວ່າກີບ, ໂຄງການກໍ່ສ້າງຕະຫຼາດເມືອງຄົງເຊໂດນ ບໍລິສັດຟ້າບັນດາຈຳກັດມີມູນຄ່າ 9.1 ຕື້ກີບ, ໂດຄງການປູກຫຍ້າ ແລະລ້ຽງງົວເປັນສິນຄ້າຈຳໜ່າຍພາຍໃນ ແລະສົ່ງອອກຕ່າງປະເທດຂອງບໍລິສັດອາຊຽນຜະລິດກະສິກຳ ແຂວງສາລະວັນ ມີມູນຄ່າ 24 ຕື້ກວ່າກີບ, ໂຄງການກໍ່ສ້າງສູນການຄ້າຄົບວົງຈອນບ້ານຫຼັກ 2 ເມືອງສາລະວັນ ຂອງກຸ່ມໄຊຊະນະ ມນຄ່າ 20 ຕື້ກີບ ແລະໂຄງການກໍ່ສ້າງຂົວຈົມຂ້າມນໍ້າເຊໂດນ ມູນຄ່າ 9.5 ຕື້ກວ່າກີບ ບ້ານທ່າເມືອງ-ບ້ານເມືອງເກົ່າ ເມືອງຄົງເຊໂດນ ຂອງບໍລິສັດ ຕິ່ງວິໄລກໍ່ສ້າງ ແລະສ້ອມແປງຂົວທາງ ຈຳກັດ
ແຫຼ່ງຂ່າວ: ໜັງສືພິມ ເສດຖະກິດ-ການຄ້າ