ສຳນັກຂ່າວເອເອຟຟີລາຍງານເມື່ອວັນທີ 20 ກຸມພາ 2017 ຜ່ານມາວ່າ ສະຖາບັນວິໄຈສັນຕິພາບນານາຊາດສະຕອກໂຮມ (ເອສໄອພີອາໄອ) ຢູ່ປະເທດສະວີເດັນ ເຜີຍແຜ່ໃນວັນທີ 20 ກຸມພາວ່າ ການຄ້າອາວຸດທົ່ວໂລກໃນຮອບ 5 ປີຫຼັງ ເພີ່ມຂຶ້ນສູ່ລະດັບສູງສຸດ ນັບຕັ້ງແຕ່ຍຸກສົງຄາມເຢັນ ຫຼືປີ 1950 ເປັນຕົ້ນມາ ເຊິ່ງມີປັດໄຈຫຼັກຄືອຸປະສົງຈາກພູມິພາກຕາເວັນອອກກາງ ແລະເອເຊຍ
ລາຍງານຂອງເອສໄອພີອາໄອບອກວ່າ ໃນລະຫວ່າງປີ 2012-2016 ການນຳເຂົ້າອາວຸດໃນແງ່ປະລິມານທົ່ວໂລກເພີ່ມຂຶ້ນ 7.7% ຈາກຊ່ວງ 5 ປີກ່ອນໜ້ານີ້ຄື 2007-2011 ເຊິ່ງເອເຊຍ ແລະໂອເຂຍເນຍ ນຳເຂົ້າອາວຸດຄິດເປັນ 43% ຂອງທົ່ວໂລກ “ການຊື້ຂາຍອາວຸດຂະໜາດໃຫຍ່ໃນປີ 2012-2016 ສູງທີ່ສຸດໃນຊ່ວງໄລຍະເວລາ 5 ປີກ່ອນໜ້ານີ້ ນັບຕັ້ງແຕ່ສິ້ນສຸດສົງຄາມເຢັນເປັນຕົ້ນມາ”
ສ່ວນແບ່ງການນຳເຂົ້າອາວຸດຂອງປະເທດໃນພູມິພາກຕາເວັນອອກກາງ ແລະອ່າວເປີເຊຍເພີ່ມຂຶ້ນຈາກ 17% ມາເປັນ 29% ຂະນະທີ່ຢູໂຣບຫຼຸດລົງຈາກ 18% ມາຢູ່ທີ່ 11%, ທະວີບອາເມລິກາຫຼຸດລົງ 2.4 ຈຸດມາຢູ່ທີ່ 8.6%, ຂະນະທີ່ອັບຟະລິກາຫຼຸດລົງ 1.3 ຈຸດມາຢູ່ທີ່ 8.1%
ອິນເດຍເປັນປະເທດນຳເຂົ້າອາວຸດລາຍໃຫຍ່ທີ່ສຸດເປັນອັນດັບທີ 1 ຮອງລົງມາແມ່ນຊາອຸດິອາຣະເບຍ ທີ່ນຳເຂົ້າອາວຸດເພີ່ມຂຶ້ນ 212%, ສະຫະລັດເປັນຜູ້ນຳສົ່ງອອກລາຍໃຫຍ່ທີ່ສຸດຄິດເປັນເປີເຊັນແມ່ນ 33% ຮອງລົງມາແມ່ນລັດເຊຍ 23% ແລະຈີນ 6.2%