ອີງຕາມຂ້ມູນຂອງບົດສະຫຼຸບການຈັດຕັ້ງປະຕິບັດແຜນພັດທະນາວຽກກງານຖະແຫຼງຂ່າວ, ວັດທະນະທຳ ແລະທ່ອງທ່ຽວ ສົກປີ 2015-2016 ແລະແຜນການໃນປີ 2017 ນີ້ວ່າ: ໃນໄລຍະໜຶ່ງປີຜ່ານມາ ວຽກງານວັດທະນະທຳໄດ້ມີຫຼາຍດ້ານທີ່ມີລັກສະນະດີຂຶ້ນກວ່າເກົ່າ ແລະສິ່ງທີ່ພົ້ນເດັ່ນກ່ອນໝູ່ແມ່ນການສ້າງຄອບຄົວ, ບ້ານ ແລະກຸ່ບ້ານວັດທະນະທຳ ມີທ່າອ່ຽງເພີ່ມຂຶ້ນທຸກປີ, ປີຜ່ານມາທົ່ວປະເທດສາມາດສ້າງຄອບຄົວວັດທະນະທຳໄດ້ 66.723 ຄອບຄົວ ເທົ່າກັບ 4,96%, ບ້ານວັດທະນະທຳ 424 ບ້ານ ເທົ່າກັບ 5,09% ແລະກຸ່ມບ້ານວັດທະນະທຳ 15 ກຸ່ມເທົ່າກັບ 1,52%, ສຳເລັດການຝຶກອົບຮົມວຽກງານການຄຸ້ມຄອງວັດທະນະທຳທົ່ວປະເທດ, ສຳເລັດການເປັນເຈົ້າການຮ່ວມກັບພະແນກວັດທະນະທຳຖະແຫຼງຂ່າວ, ວັດທະນະທຳ ແລະທ່ອງທ່ຽວນະຄອນຫຼວງວຽງຈັນ ໃນການຈັດກິດຈະກຳປັ້ນຮູບປະຕິມະກຳຊາຍຢູ່ຫາດດອນຈັນ ເນື່ອງໃນໂອກາດຕ້ອນຮັບປີໃໝ່ ສົ່ງທ້າຍປີເກົ່າ 255, ເກັບກຳຂໍ້ມູນເພື່ອຟື້ນຟູ ສົ່ງເສີມເອກະລັກວັດທະນະທຳພື້ນເມືອງ ແລະຮີດຄອງປະເພນີລາວບັນດາເຜົ່າ, ຕິດຕາມກວດສອບວຽກງານຄຸ້ມຄອງໂຄສະນາປ້າຍ.
ສະນັ້ນໃນປີ 2017 ພາກສ່ວນກ່ຽວຂ້ອງຈະສືບຕໍ່ສ້າງຮ່າງດຳລັດວ່າດ້ວຍການສ້າງຄອບຄົວວັດທະນະທຳ, ບ້ານວັດທະນະທຳ, ກຸ່ມບ້ານວັດທະນະທຳໃຫ້ສຳເລັດ, ພ້ອມນັ້ນກໍສືບຕໍ່ຮ່າງດຳລັດວ່າດ້ວຍການຄຸ້ມຄອງປະເພນີ ແລະຂໍ້ກຳນົດວ່າດ້ວຍການຄຸ້ມຄອງສະໂມສອນວັດທະນະທຳ ແລະສືບຕໍ່ສ້າງຄອບຄົວວັດທະນະທຳໃຫ້ໄດ້ 60 ພັນຄອບຄົວ, ບ້ານວັດທະນະທຳ 400 ບ້ານ, ກຸ່ມບ້ານວັດທະນະທຳ 17 ກຸ່ມບ້ານ ແລະສ້າງບ້ານຕົວແບບທາງດ້ານວັດທະນະທຳໃຫ້ໄດ້ອີກ 2 ບ້ານ
ຂ່າວ: ໜັງສືພິມ ເສດຖະກິດ-ສັງຄົມ