ໃນວັນທີ 14 ກຸມພາ 2017 ຜ່ານມາ ຢູ່ທີ່ບ້ານນາກົກໂພ ເມືອງສາລະວັນ ແຂວງສາລະວັນ ໄດ້ມີພິທີເປີດບໍລິສັດ ແລະ ເປີດການກໍ່ສ້າງໂຄງການເຂື່ອນໄຟຟ້ານ້ຳຕົກເຊລະນອງ ໂດຍມີທ່ານ ຄຳຈັນ ແຈ່ມສະໝອນ ປະທານກວດກາພັກ-ລັດ ແຂວງສາລະວັນ, ທ່ານ ສະໄໝ ໂພທິສານ ຫົວໜ້າຫ້ອງວ່າການປົກຄອງແຂວງສາລະວັນ, ທ່ານນາງ ປານີ ທີລະກຸນ ປະທານກຸ່ມບໍລິສັດ ຂະຍຸງຄຳທີລະກຸນ ປະທານບໍລິສັດ ໄຟຟ້ານ້ຳຕົກເຊລະນອງ 3 ພາວເວີ ຈຳກັດ ພ້ອມດ້ວຍບັນດາພະແນກການ ຄະນະບໍລິຫານກຸ່ມບໍລິສັດ ຂະຍຸງຄຳທີລະກຸນ ແລະ ແຂກຖືກເຊີນເຂົ້າ.
ທ່ານ ຫັດສະດີ ທີລະກຸນ ຮອງປະທານກຸ່ມບໍລິສັດ ຂະຍຸງຄຳທີລະກຸນ ຮອງປະທານບໍລິສັດ ໄຟຟ້ານ້ຳຕົກເຊລະນອງ 3 ພາວເວີ ຈຳກັດ ກ່າວວ່າ: ເຂື່ອນໄຟຟ້ານ້ຳຕົກເຊລະນອງ 3 ຕັ້ງຢູ່ບ້ານຕຸງຊະ ເມືອງຕະໂອ້ຍ ແຂວງສາລະວັນ ມີກຳລັງການຕິດຕັ້ງ 12,5 ເມກາວັດ ສາມາດຜະລິດກະແສໄຟຟ້າໄດ້ 54,32 ຈີກາວັດໂມງຕໍ່ປີ ມູນຄ່າການກໍ່ສ້າງ 31.712.830 ໂດລາສະຫະລັດ ຫຼື ປະມານ 256,36 ຕື້ກີບ ພາຍຫຼັງໂຄງການໄດ້ຮັບອະນຸຍາດດຳເນີນໂຄງການຈາກ ພັກ-ລັດ ອຳນາດການປົກຄອງທ້ອງຖິ່ນ. ກຸ່ມບໍລິສັດພວກເຮົາ ກໍ່ໄດ້ສຸມທຶນຮອນເຂົ້າໃນການສຶກສາຄວາມເປັນໄປໄດ້ດ້ານຕ່າງໆ ເຊິ່ງເຫັນວ່າໂຄງການນີ້ ເປັນເສດຖະກິດມີຜົນກະທົບໜ້ອຍ ສາມາດລົງທຶນໄດ້ ແລະ ໄດ້ລົງນາມສັນຍາຄຸ້ມຄອງໂຄງການໃນເດືອນສິງຫາ 2016 ພ້ອມທັງສຳເລັດການສ້າງຕັ້ງບໍລິສັດໂຄງການ ເຈລະຈາຊື້-ຂາຍໄຟຟ້າກັບລັດວິສາຫະກິດໄຟຟ້າລາວ ແລະ ກຽມຊົດເຊີຍຜົນກະທົບຕາມລະບຽບການ ປັດຈຸບັນ ພວກເຮົາມີຄວາມພ້ອມທຸກດ້ານ ແລະ ຈະລົງມືກໍ່ສ້າງເປັນທາງການ ໃນທ້າຍປີ 2017 ໂດຍຈະໃຊ້ເວລາກໍ່ສ້າງ 3 ປີ ຈາກນັ້ນ ກໍ່ຈະເລີ່ມຜະລິດຂາຍໃຫ້ລັດວິສາຫະກິດໄຟຟ້າລາວ ເພື່ອສະໜອງໃຫ້ປະຊາຊົນທີ່ມີຄວາມຕ້ອງການໂຄງການເຂື່ອນໄຟຟ້ານ້ຳຕົກເຊລະນອງ 3 ນອກຈາກຈະປະກອບສ່ວນໃນການພັດທະນາພະລັງງານໄຟຟ້າຂອງພັກ ແລະ ລັດຖະບານແລ້ວ ຍັງຈະນຳຜົນປະໂຫຍດຫຼາຍຢ່າງມາສູ່ປະຊາຊົນ ໂດຍສະເພາະ ການພັດທະນາພື້ນຖານໂຄງລ່າງ ສ້າງວຽກເຮັດງານທຳໃຫ້ປະຊາຊົນທ້ອງຖິ່ນ ແລະ ເຂດໃກ້ຄຽງ.
ແຫຼ່ງຂ່າວ: ໜັງສືພິມ ວຽງຈັນໃໝ່