ສຳນັກຂ່າວຕ່າງປະເທດລາຍງານມື້ວັນທີ 12 ສິງຫາ 2014 ຜ່ານມາວ່າ ຊາຍຈີນອາຍຸ 57 ປີ ເຊິ່ງອາໄສຢູ່ໃນເຂດ
ກ່ວນຢວນ ແຂວງເສສວນຂອງຈີນ ກຳລັງເປັນກະແສດັງໃນເຄືອຂ່າຍສັງຄົມອອນລາຍຂອງຈີນໃນຂະນະນີ້
ຫຼັງຈາກເກີດເຫດມີດຫຼົ່ນມາຈາກລະບຽງຂອງອາພາດເມັ້ນທີ່ເຂົາຍ່າງຜ່ານ ຕົກໃສ່ຫົວຂອງເຂົາພໍດີ ໂດຍມີດ
ຂະໜາດ 5 ນິ້ວ ໄດ້ເຈົ້າເຂົ້າກະໂຫຼກເລິກລົງໄປເຖິງສະໝອງປະມານ 12 ຊັງຕີແມັດ.
ຊາຍຄົນດັ່ງກ່າວເປີດເຜີຍວ່າ ໃນຂະນະທີ່ເກີດເຫດນັ້ນ ເຂົາຍ່າງຜ່ານບໍລິເວນດັ່ງກ່າວ ແລະ ພໍຜ່ານມາໄດ້ໄລຍະ
ໜຶ່ງ ເຂົາຮູ້ສຶກວ່າຫົວຂອງເຂົາໜັກຂຶ້ນ ເຊິ່ງຄົນທີ່ຍ່າງຜ່ານມາເຫັນເຂົາກໍພາກັນຕົກໃຈຮ້ອງຂຶ້ນ ແລ້ວຊີ້ບອກ
ໃຫ້ເຂົາຮູ້ໂຕວ່າ ມີມຽດສຽບຢູ່ເທິງຫົວຂອງເຂົາ ເຊິ່ງເຄາະດີທີ່ມີຄົນໂທແຈ້ງລົດໂຮງໝໍມາຊ່ວຍໄດ້ທັນ ແລະ ໃນ
ທີ່ສຸດແພດກໍສາມາດຜ່າຕັດນຳເອົາມີດໃນກະໂຫລກອອກມາໄດ້ ໂດຍອາການຂອງເຂົາຄ່ອຍໆດີຂຶ້ນຕາມລຳດັບ.
ທັງນີ້ ຜູ້ທີ່ເປັນເຈົ້າຂອງມີດເຫລັ້ມດັ່ງກ່າວ ໄດ້ມາສະແດງໂຕເພື່ອຮັບຜິດຊອບຄ່າຮັກສາພະຍາບານສ່ວນໜຶ່ງ
ພ້ອມກັບເປີດເຜີຍວ່າ ເຂົາຢູ່ຊັ້ນທີ 8 ຂອງຕຶກອາພາດເມັ້ນດັ່ງກ່າວ ກຳລັງໃຊ້ມີດເຫຼັ້ມນັ້ນຄົວກິນຢູ່ ແລະ ວາງ
ມັນໄວ້ບໍລິເວນກະຖາງຕົ້ນໄມ້ນອກລະບຽງ ໂດຍບໍ່ຄິດວ່າມັນຈະຕົກລົງມາສຽບເຂົ້າຫົວຂອງຄົນທີ່ຢູ່ດ້ານລຸ່ມ
ສ່ວນສາເຫດທີ່ຄິດວ່າມີດຕົກລົງມານັ້ນ ອາດແມ່ນຍ້ອນກະແສລົມພັດ.