ພາຍຫລັງທ່ານສົມດີ ດວງດີ ສຳເລັດເຮັດວຽກຢູ່ ແຂວງຫລວງພະບາງ, ໃນວັນທີ 15 ກຸມພາ 2017ຜ່ານມານີ້ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ພ້ອມດ້ວຍຄະນະ ກໍໄດ້ສືບຕໍ່ເດີນທາງ ໄປຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ໂດຍ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ຫົວໜ້າພະແນກການເງິນ ແຂວງອຸດົມໄຊ, ຄະນະປະຈໍາພັກແຂວງ ແລະ ພະນັກງານຫລັກແຫລ່ງຂອງແຂວງ ໃຫ້ການຕ້ອນຮັບ.
ທ່ານເຈົ້າແຂວງ ໄດ້ລາຍງານໃຫ້ ທ່ານຮອງນາຍົກ ຊາບເຖິງສະພາບລວມວ່າ: ເສດຖະກິດໄດ້ສືບຕໍ່ຂະຫຍາຍຕົວຕໍ່ເນື່ອງ ໃນອັດຕາການເຕີບໂຕ 7,5%, ລວມຍອດຜະລິດຕະພັນພາຍໃນ (GDP) ບັນລຸໄດ້ 3.500 ກວ່າຕື້ກີບ, ສະເລ່ຍ 1.397 ໂດລາຕໍ່ຄົນຕໍ່ປີ, ດ້ານການຈັດເກັບລາຍຮັບ ໃນສົກປີ 2015-2016 (ແຜນດັດແກ້ທັງໝົດ) ເທົ່າກັບ 100 ຕື້ກວ່າກີບ, ປະຕິບັດໄດ້ 98 ຕື້ກວ່າກີບ, ທຽບໃສ່ແຜນດັດແກ້ 94,8%, ທຽບໃສ່ໄລຍະດຽວກັນ ຜ່ານມາເພີ່ມຂຶ້ນ 5%, ດ້ານລາຍຈ່າຍທັງໝົດ ໃນສົກປີ 2015-2016 (ແຜນດັດແກ້) ເທົ່າກັບ 460 ຕື້ກວ່າກີບ, ທຽບໃສ່ແຜນດັດແກ້ ປະຕິບັດໄດ້ 96,99% ທຽບໃສ່ໄລຍະດຽວກັນ ຂອງປີຜ່ານມາເທົ່າກັບ 97% ຫລຸດລົງ 3% ສະເພາະລາຍຮັບໃນ 3 ເດືອນຂ້າມຜ່ານແຜນຈັດເກັບລາຍຮັບ ເຂົ້າງົບປະມານໄດ້ທັງໝົດ 14 ຕື້ກວ່າກີບ, ສາມາດປະຕິບັດໄດ້ 16 ຕື້ກວ່າກີບ, ທຽບໃສ່ແຜນເທົ່າກັບ 111%, ແຜນງົບປະມານ ປະຈໍາປີ 2017 ແຂວງອຸດົມໄຊ ຈະຕ້ອງສູ້ຊົນ ຈັດເກັບລາຍຮັບພາຍໃນແຂວງ ເຂົ້າງົບປະມານ ໃຫ້ໄດ້ທັງໝົດ 115,40 ຕື້ກີບ, ທຽບໃສ່ສົກປີ 2015-2016 ເພີ່ມຂຶ້ນ 16,8%, ທຽບໃສ່ GDP ເທົ່າກັບ 23,7% ໃນນັ້ນ ລາຍຮັບພູດທ້ອງຖິ່ນ 106,20 ຕື້ກີບ, ລາຍຮັບພູດສູນກາງ 9,20 ຕື້ກີບ.
ໂອກາດນີ້, ທ່ານ ຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍ ຕໍ່ບັນດາຜົນງານການພັດທະນາ ທີ່ຄະນະພັກ-ຄະນະນຳແຂວງ ໄດ້ພ້ອມພຽງຮຽງໜ້າກັບ ບັນດາພະນັກງານ, ທະຫານ, ຕຳຫລວດ ແລະ ພໍ່ແມ່ປະຊາຊົນ ຊາວແຂວງອຸດົມ ໄຊຍາດໄດ້ໃນໄລຍະ 1 ປີທີ່ຜ່ານມາ ແລະຍັງໄດ້ເນັ້ນຕື່ມບາງທິດທາງ ເພື່ອໃຫ້ຄະນະພັກ-ຄະນະນຳແຂວງ ເອົາໃຈໃສ່ຄື: ຕ້ອງຮັບປະກັນ ສະຖຽນລະພາບທາງດ້ານການເມືອງ, ເຮັດໃຫ້ແຂວງ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ໃຫ້ໄດ້ຢ່າງໜັກແໜ້ນ ໂດຍສະເພາະ ແມ່ນການເພີ່ມທະວີ ຄວາມສາມັກຄີພາຍໃນພັກ ປະຕິບັດກົດລະບຽບພັກ ຢ່າງເຂັ້ມງວດ; ຕ້ອງຊຸກຍູ້ການເຕີບໂຕ ເສດຖະກິດຂອງແຂວງ ໃຫ້ໄດ້ຢ່າງຕໍ່ເນື່ອງ; ຈົ່ງນຳໃຊ້ທ່າແຮງ ອັນບົ່ມຊ້ອນຂອງແຂວງ, ຂຸດຄົ້ນລາຍລາຍຮັບໃໝ່, ພ້ອມທັງຍົກຖານລາຍຮັບ ຫົວໜ່ວຍທຸລະກິດ ທີ່ມີລາຍຮັບ 400 ລ້ານກີບຂຶ້ນໄປຕ້ອງເຂົ້າຢູ່ໃນ ລະບົບອາກອນມູນຄ່າເພີ່ມ, ສຸ່ມໃສ່ການຜະລິດກະສິກຳ ເປັນສິນຄ້າ ແລະ ຫັນມາສົ່ງເສີມທຸລະກິດ ຂະໜາດນ້ອຍ ແລະ ກາງ (SME) ທີ່ເປັນພື້ນຖານອັນສໍາຄັນ ເພື່ອໃຫ້ແຜນຈັດເກັບງົບປະມານ ປະຈຳປີ 2017 ບັນລຸ 115,40 ຕື້ກີບ.
ແຫຼ່ງຂ່າວ: ສຳນັກຂ່າວສານປະເທດລາວ