ໃນວັນທີ 15 ກຸມພາ 2017 ຜ່ານມາທີ່ ຫ້ອງປະຊຸມສຳນັກງານນາຍົກລັດຖະມົນຕີ ໄດ້ເປີດກອງປະຊຸມລັດຖະບານສະໄໝວິສາມັນປະຈຳ ເດືອນກຸມພາ 2017 ໂດຍການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ສະມາຊິກລັດຖະບານ ແລະ ພາກສ່ວນກ່ຽວຂ້ອງເຂົ້າຮ່ວມ.
ພາຍໃນກອງປະຊຸມໄດ້ຮັບຟັງ ແລະພິຈາລະນາຮ່າງກົດໝາຍ 9 ສະບັບ ປະກອບມີ: ຮ່າງກົດໝາຍວ່າດ້ວຍສົນທິສັນຍາ ແລະສັນຍາສາກົນ, ຮ່າງປະມວນກົດໝາຍແພ່ງ, ຮ່າງປະມວນກົດໝາຍອາຍາສະບັບປັບປຸງ ພາຍຫຼັງນຳເຂົ້າ ທາບທາມໃນກອງປະຊຸມສະໄໝ ສາມັນ ເທື່ອທີ II ຂອງສະພາແຫ່ງຊາດ ຊຸດທີ VIII ໃນວັນທີ 16 ພະຈິກ 2016, ຮ່າງກົດໝາຍວ່າດ້ວຍອົງການກາແດງລາວ, ຮ່າງກົດໝາຍວ່າດ້ວຍ ກຳລັງປ້ອງກັນຄວາມສະຫງົບ ປະຊາຊົນ ສະບັບປັບປຸງ, ຮ່າງກົດໝາຍວ່າດ້ວຍຄື້ນຄວາມຖີ່ວິທະຍຸ, ຮ່າງກົດໝາຍວ່າດ້ວຍ ສິລະປະການສະແດງ, ຮ່າງກົດໝາຍວ່າດ້ວຍນ້ຳ ແລະ ຊັບພະຍາກອນແຫຼ່ງນ້ຳ ແລະ ຮ່າງກົດໝາຍວ່າດ້ວຍການປົກປ້ອງອຸດສາຫະກຳພາຍໃນ.
ຈາກນັ້ນບັນດາສະມາຊິກລັດຖະບານ ກໍໄດ້ປະກອບ ຄຳຄິດຄຳເຫັນໃສ່ຮ່າງກົດໝາຍ ແຕ່ລະສະບັບຢ່າງກົງໄປກົງມາ ເພື່ອເຮັດໃຫ້ເນື້ອໃນຮັດກຸມ ແລະອຸດົມສົມບູນຂຶ້ນ, ກ່ອນຈະນຳສະເໜີເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ VIII ເຊິ່ງກອງປະຊຸມລັດຖະບານສະໄໝວິສາມັນປະຈຳເດືອນກຸມພານີ້ ຈະໄດ້ສືບຕໍ່ ຈົນຮອດວັນທີ 16 ກຸມພາ ຈຶ່ງຈະປິດລົງ.
ແຫຼ່ງຂ່າວ: ໜັງສືພິມ ປະຊາຊົນ