ໃນວັນທີ 13-14 ກຸມພາ 2017 ຜ່ານມາ ທີ່ຫ້ອງວ່າການແຂວງຫຼວງພະບາງ ໄດ້ເປີດກອງປະຊຸມສະຫຼຸບຕີລາຄາ ການຈັດຕັ້ງປະຕິບັດ ການຫັນວຽກງານພາສີ, ສ່ວຍສາອາກອນ ແລະ ຄັງເງິນແຫ່ງຊາດ ໂດຍເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ພ້ອມດ້ວຍຄະນະທີ່ກ່ຽວຂ້ອງເຂົ້າຮ່ວມ
ໃນກອງປະຊຸມ ທ່ານ ສົມດີ ດວງດີ ໄດ້ເນັ້ນໜັກໃຫ້ສາມຂະແໜງການເງິນ ເອົາໃຈໃສ່ ແນະນຳອອກຂໍ້ຕົກລົງ ວ່າດ້ວຍ ຂໍ້ຫ້າມ ແລະ ວິໄນຂອງພະນັກງານ-ລັດຖະກອນ ຂະແໜງການເງິນ ໃນການປະຕິບັດໜ້າທີ່ ວິຊາສະເພາະໃຫ້ມີຄວາມໂປ່ງໃສ ຂຶ້ນກວ່າເກົ່າ ເພື່ອຮັບປະກັນໃຫ້ການຄຸ້ມຄອງລາຍຮັບ-ລາຍຈ່າຍງົບປະມານຂອງລັດ ລວມສູນຢູ່ຄັງເງິນແຫ່ງຊາດ ແລະ ມີການເບີກຈ່າຍງົບປະມານ ໄປຕາມແຜນພັດທະນາເສດຖະກິດ-ສັງຄົມ ທີ່ສະພາແຫ່ງຊາດຮັບຮອງ.
ກອງປະຊຸມຄັ້ງນີ້, ໄດ້ຮັບຟັງການລາຍງານ ສະພາບຄວາມເປັນມາ ນັບທັງວິທີການ, ຂັ້ນຕອນ ແລະ ບາດກ້າວ ໃນການຫັນເປັນສາຍຕັ້ງ, ຕີລາຄາຄືນດ້ານດີຕັ້ງໜ້າ, ດ້ານອ່ອນຄົງຄ້າງ ແລະ ຜົນໄດ້ຮັບ ໃນການຈັດຕັ້ງປະຕິບັດ ການຄຸ້ມຄອງວຽກງານສາຍຕັ້ງ, ບົດຮຽນທີ່ຖອດຖອນໄດ້ ແລະ ທິດທາງໃນຕໍ່ໜ້າ.
ກອງປະຊຸມ ຍັງໄດ້ລົງເລິກບົດແນະນໍາ ໃນການຈັດຕັ້ງ ປະຕິບັດຄໍາສັ່ງ ຂອງນາຍົກລັດຖະມົນຕີເລກທີ 35/ນຍ ແລະ ການກໍານົດກົນໄກການປະສານສົມທົບ ກັບທຸກພາກສ່ວນກ່ຽວຂ້ອງ (ການແຕ່ງຕັ້ງ, ຍົກຍ້າຍ, ປົດຕໍາແໜ່ງ, ການປະຕິບັດວິໄນ, ການຍ້ອງຍໍພະນັກງານ) ເປັນຕົ້ນ.
ແຫຼ່ງຂ່າວ: ສຳນັກຂ່າວສານປະເທດລາວ