ອີງຕາມຂ່າວລືຈາກມື້ກ່ອນນີ້, ເຮົາຮູ້ວ່າ Nokia ຈະເປີດໂຕໂທລະສັບລຸ້ນໃໝ່ 3 ລຸ້ນທີ່ງານ MWC 2017 ທີ່ຈະຈັດຂຶ້ນຢູ່ Barcelona ໃນເດືອນນີ້. ໂດຍ 3 ລຸ້ນນີ້ໄດ້ແກ່: Nokia 3 ແລະ 5 ທີ່ເປັນລະບົບ Android ແລະລຸ້ນສຸດທ້າຍກໍຄື Nokia 3310 ທີ່ເປັນລຸ້ນໃນຕຳນານຂອງທາງບໍລິສັດເລີຍ!
ຢ່າງໃດກໍຕາມຂ່າວລືຕ່າງໆກໍຫຼຸດອອກມາ ໜຶ່ງໃນນັ້ນກໍຄືສະເປັກຂອງ Nokia 5 ທີ່ຈະມາພ້ອມຈໍຂະໜາດ 5.2 ນິ້ວ, RAM 2GB ແລະກ້ອງ 12 ລ້ານພິກເຊວ, ເຊິ່ງທັງໝົດນີ້ຈະຂາຍທີ່ລາຄາປະມານ $200. ສ່ວນທາງດ້ານ Nokia 3 ທີ່ມີຂ່າວລືວ່າຈະເປັນລຸ້ນທີ່ເຮັດມາລົ້ມໄອໂຟນ ແຕ່ເບິ່ງຄືວ່າຈະບໍ່ເປັນແບບນັ້ນແລ້ວ ເພາະມີສະເປັກຫຼຸດອອກມາວ່າຈະມາພ້ອມຈໍຂະໜາດ 5.2 ນິ້ວ, ຄວາມລະອຽດ HD, ໃຊ້ຊິບ Snapdragon 425, RAM 2GB, ROM 16GB ແລະກ້ອງໜ້າ 5 ລ້ານພິກເຊວ, ໂດຍລຸ້ນນີ້ຈະມີລາຄາຢູ່ທີ່ປະມານ $150.
ສຳລັບ Nokia 3 ນັ້ນອາດຈະວາງຂາຍໃນຊ່ວງເດືອນມີນາ ຫຼື ເດືອນເມສານີ້ ແລະຈະວາງຂາຍໃນ “ຕະຫຼາດໂລກ” ເຊິ່ງຕ່າງຈາກ Nokia 6 ທີ່ເປັນລຸ້ນຂາຍສະເພາະປະເທດຈີນເທົ່ານັ້ນ.
ທີ່ມາ: phonearena