ສຳນັກຂ່າວຕ່າງປະເທດລາຍງານເມື່ອວັນທີ 14 ກຸມພາ 2017 ຜ່ານມາວ່າ ທ່ານ ຊິເກໂນຣິ ຊິກະ ປະທານບໍລິສັດໂຕຊິບາ ໄດ້ຕັດສິນໃຈລາອອກຈາກຕຳແໜ່ງ ຫຼັງຈາກທີ່ບໍລິສັດປະສົບກັບບັນຫາຂາດທຶນຫຼາຍເຖິງ 6 ພັນລ້ານໂດລາສະຫະລັດ ຈາກທຸລະກິດນິວເຄຣຍໃນສະຫະລັດອາເມລິກາ, ທາງໂຕຊີບາ ໄດ້ບອກວ່າ ຊິກະ ລາອອກເພື່ອຮັບຜິດຊອບຕໍ່ຄວາມເສຍຫາຍຂອງບໍລິສັດ ແຕ່ຍັງຄົງຢູ່ໃນຄະນະກຳມະການບໍລິຫານບໍລິສັດຕໍ່ໄປ ຈົນເຖິງເດືອນມິຖຸນາ ເພື່ອຈັດການກັບບັນຫາທີ່ເກີດຂຶ້ນ

ການຂາດທຶນຄັ້ງໃຫຍ່ດັ່ງກ່າວ ເຮັດໃຫ້ນັກວິເຄາະເຕືອນວ່າ ອະນາຄົດຂອງບໍລິສັດອາດຕົກຢູ່ໃນຄວາມສ່ຽງ ເຊິ່ງທາງໂຕຊິບາ ໄດ້ຮ້ອງຂໍເວລາຈາກເຈົ້າໜ້າທີ່ ເພື່ອຈັດການເຮັດລາຍງານຄວາມເສຍຫາຍທາງທຸລະກິດ ເຊິ່ງຈະລວມເຖິງລາຍລະອຽດຕ່າງໆ ທີ່ບໍລິສັດວາງໄວ້ ເພື່ອຮັບມືກັບຜົນກະທົບທາງການເງິນທີ່ເກີດຂຶ້ນ

ຈາກຂ່າວດັ່ງກ່າວ ໄດ້ເຮັດໃຫ້ຮຸ້ນຂອງໂຕຊິບາ ປັບຫຼຸດລົງອີກ 9% ຫຼັງຈາກທີ່ມູນຄ່າຮຸ້ນຂອງບໍລິສັດປັບລົງມາແລ້້ວເຖິງ 50% ນັບຕັ້ງແຕ່ເດືອນທັນວາ ປີ 2016 ຜ່ານມາ ເຊິ່ງຖືເປັນຄັ້ງທຳອິດທີ່ມີການເຕືອນເຖິງບັນຫາຄວາມຮ້າຍແຮງ