ສຳນັກຂ່າວຕ່າງປະເທດລາຍງານວັນທີ 14 ກຸມພາ 2017ຜ່ານມາວ່າ ດູໄບວາງແຜນເປີດໃຊ້ງານແທັກຊີ່ບິນໄດ້ ໃນເດືອນກໍລະກົດນີ້ ຫຼັງຈາກມີການທົດລອງພາຫະນະຕົ້ນແບບຈາກປະເທດຈີນ ເປັນພາຫະນະບໍ່ມີຄົນຂັບ ເຊິ່ງຄາດວ່າຈະສາມາດເອົາມານໍາໃຊ້ງານໄດ້

ການທົດລອງແທັກຊີ່ບິນໄດ້ ບໍ່ມີຄົນຂັບນີ້ ໃນວັນທີ 13 ກຸມພາ 2017 ຜ່ານມາ ພາຫະນະດັ່ງກ່າວ ມີຊື່ວ່າ EHang 184 ສາມາດເດີນທາງດ້ວຍຄວາມໄວ 100 ກິໂລແມັດຕໍ່ຊົ່ວໂມງ ແລະບິນສູງຈາກພື້ນດິນໄດ້ 300 ແມັດ ເຊິ່ງຜູ້ໂດຍສານຈະເປັນຜູ້ເລືອກເສັ້ນທາງ ຈາກນັ້ນຍານພາຫະນະກໍຈະບິນຂຶ້ນໄປຕາມເສັ້ນທາງ ແລະລົງຈອດໃນຈຸດທີ່ເລືອກໄວ້ ຕະຫຼອດໄລຍະເວລາຂອງການເດີນທາງ ຈະມີການຕິດຕາມຈາກສູນພາກພື້ນດິນ

Ehang ເປັນຍານພາຫະນະທີ່ຜູ້ຜະລິດໂດຣນໃນປະເທດຈີນ ເປັນຜູ້ພັດທະນາຂຶ້ນ ສາມາດສາກພະລັງງານໄດ້ 2 ຊົ່ວໂມງ, ທາງເຈົ້າໜ້າທີ່ການຂົນສົ່ງເວົ້າວ່າ ຍານພາຫະນະນີ້ ໄດ້ເອົາມາສະແດງໃນງານ  World Government Summit ແລະເຫັນໄດ້ວ່າ ບໍ່ແມ່ນເປັນພຽງຫຸ່ນຈຳລອງເທົ່ານັ້ນ ແຕ່ເປັນສິ່ງທີ່ຜ່ານການທົດລອງແລ້ວວ່າ ສາມາດບິນໄດ້ແທ້ ເທິງທ້ອງຟ້າຂອງດູໄບ ເຊິ່ງທາງການຄາດວ່າ ຍານພາຫະນະໃໝ່ນີ້ ຈະຊ່ວຍຫຼຸດຄວາມໜາແໜ້ນຂອງການຈະລາຈອນໃນເມືອງ