ໃນວັນທີ 9 ກຸມພາ 2017 ຜ່ານມາ ທີ່ບ້ານຈັດສັນປາກໄຜ່ ໄດ້ມີພິທີມອບ-ຮັບເງິນຄ່າລົບກວນ ໂດຍມີທ່ານຄຳສິງ ສໍລະສຸກ ເຈົ້າແຂວງໄຊຍະບູລີ, ທ່ານ ສົມໝາຍ ແສນພັນສີລິ ຫົວໜ້າໜ່ວຍງານຄຸ້ມຄອງການຍັບຍ້າຍຈັດສັນໂຄງການໄຟຟ້າ ພະລັງນໍ້າໄຊຍະບູລີ ແຂວງໄຊຍະບູລີ, ມີພະນັກງານ, ອຳນາດການປົກຄອງ ແລະປະຊາຊົນທີ່ໄດ້ຮັບຜົນກະທົບເຂົ້າຮ່ວມ
ໃນພິທີ ໄດ້ມີການມອບເງິນຄ່າຊົດເຊີຍລົບກວນ ໃຫ້ປະຊາຊົນຜູ້ທີ່ໄດ້ຮັບຜົນກະທົບ ຜູ້ລະ 15 ດອນລາສະຫະລັດ ຫຼືປະມານ 120.000 ກີບ ແລະໄດ້ມີການສະຫຼຸບກ່ຽວກັບການຈັດສັນຄອບຄົວທີ່ຖືກຜົນກະທົບ ເຊິ່ງມີທັງໝົດ 21 ຄອບຄົວ ມີ 108 ຄົນ, ໃນນີ້ມີ 3 ຄອບຄົວມີຈຳນວນ 8 ຄົນ ໄດ້ເຮືອນຄອບຄົວລະ 2 ຫຼັງ, ມີທັງໝົດ 24 ຫຼັງຄາເຮືອນເປັນເຮືອນ 2 ຊັ້ນ ເຊິ່ງຊັ້ນເທິງເຮັດດ້ວຍໄມ້, ມຸງດ້ວຍສັງກະສີ, ມີ 1 ຫ້ອງນໍ້າ ພ້ອມນໍ້າກ໊ອກ 1 ກ໊ອກ, ເຮືອນດັ່ງກ່າວນັ້ນປະກອບມີ 3 ປະເພດຄື: ປະເພດ 1 ມີ 22 ຫຼັງ, ປະເພດ 2 ມີ 1 ຫຼັງ ແລະ ປະເພດ 3 ມີ 1 ຫຼັງ, ສຳລັບການສ້າງບ້ານຈັດສັນນີ້ເລີ່ມປະຕິບັດແຕ່ປີ 2016 ມາຮອດປັດຈຸບັນຖືວ່າສຳເລັດ 100% ລວມມູນຄ່າການກໍ່ສ້າງທັງໝົດ 5 ຕື້ກວ່າກີບ.
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ