ກະເພາະອາຫານເປັນສ່ວນທີ່ສຳຄັນທີ່ສຸດ ຂອງລະບົບຍ່ອຍອາຫານ ດັ່ງນັ້ນ ເຮົາຕ້ອງດູແລຮັກສາກະເພາະອາຫານບໍ່ໃຫ້ເກີດອາການສຽດສີໃດຂຶ້ນ ເຊິ່ງມີສາເຫດຫຼາຍໆຢ່າງທີ່ເຮັດໃຫ້ເກີດອາການເຈັບທ້ອງ ຫຼືເປັນພະຍາດກະເພາະອາຫານ ແຕ່ສາເຫດທີ່ພົບເຫັນໄດ້ຫຼາຍທີ່ສຸດໄດ້ແກ່: ກະເພາະອັກເສບ, ແຜໃນກະເພາະ, ອາການແໜ້ນທ້ອງ, ການຕິດເຊື້ອໃນເຍື່ອກະເພາະ, ນອກນັ້ນອາຫານກໍເປັນສ່ວນໜຶ່ງ ທີ່ອາດເຮັດໃຫ້ເກີດບາດແຜໃນກະເພາະອາຫານ ລວມເຖິງຄວາມຕຶງຄຽດ, ເຄື່ອງດື່ມແອວກໍຮໍ ແລະການໃຊ້ຢາບາງຊະນິດ ແລະວິທີປິ່ນປົວດ້ວຍສະໝຸນໄພທຳມະຊາດມີຄື:
- ຂີ້ໝິ້ນ: ສາມາດຫຼຸດບາດແຜໃນກະເພາະອາຫານ, ຫລຸດອາການອັກເສບ ແລະຊ່ວຍກະຕຸ້ນຂັບນໍ້າບີ ໃຫ້ຍ່ອຍອາຫານດີຂຶ້ນ ວິທີໃຊ້ແມ່ນເອົາຫົວຂີ້ໝິ້ນ ມາລ້າງໃຫ້ສະອາດແລ້ວປອກເປືອກ ປາດເປັນປ່ຽງບາງໆ ຕາກແດ 1-2 ວັນ ເອົາມາບົດ ປະສົມກັບນໍ້າເຜິ້ງກິນເທື່ອລະ 500 ມິນລີກຣາມ ມື້ລະ 4 ຄັ້ງ
- ຫວ້ານຫາງແຂ້: ເປັນສະໝຸນໄພຊະນິດໜຶ່ງ ທີ່ຊ່ວຍປິ່ນປົວອາການເຈັບກະເພາະ, ຊ່ວຍປິ່ນປົວອາການບາດແຜໃນກະເພາະອາຫານ ແລະລ້າງພິດ ວິທີເຮັດແມ່ນເອົາໃບສົດ ລ້າງໃຫ້ສະອາດແລ້ວປອກເປືອກໃຫ້ເຫຼືອແຕ່ວຸນໃສໆແລ້ວເອົາມາລ້າງນໍ້າອີກ ກ່ອນຕັດເປັນຕ່ອນນ້ອຍ ປະມານ 3 ນິ້ວໃຫ້ກິນທຸກມື້ກ່ອນອາຫານເຊົ້າ ແລະແລງ
- ກ້ວຍນໍ້າ: ສາມາດປິ່ນປົວພະຍາດກະເພາະອາຫານໄດ້ ດ້ວຍການເອົາກ້ວຍນໍ້າດິບມາປາດເປັນປ່ຽງແລ້ວບົດໃຫ້ລະອຽດ ແລ້ວເອົາປະສົມກັບນໍ້າເຜິ້ງ ກັບນໍ້າດື່ມ ຫຼືເອົາຜົງຈາກກ້ວຍດິບ ມາໂຮຍໃນອາຫານປະເພດເຂົ້າປຽກເຂົ້າ ເພື່ອກິນປ້ອງກັນ ແລະປິ່ນປົວອາການເຈັບກະເພາະ