ວິທີກຳຈັດປວກອາດເຮັດໄດ້ດ້ວຍຫຼາຍວິທີ ແຕ່ວິທີການໃຊ້ສະໝຸນໄພໃນການກຳຈັດປວກ ນອກຈາກເປັນວິທີທີ່ສາມາດກຳຈັດປວກແບບໄດ້ຜົນແລ້ວ ຍັງເປັນມິດກັບສິ່ງແວດລ້ອມອີກດ້ວຍ ເພາະຫຼຸດການໃຊ້ສານເຄມີຕ່າງໆ ເຊິ່ງສະໝຸນໄພທີ່ໃຊ້ນີ້ ເປັນສະໝຸນໄພທີ່ຊອກຫາໄດ້ງ່າຍ ເພາະເຮົາຈະນຳມາປະກອບອາຫານ, ສະໝຸນໄພທີ່ໃຊ້ໄດ້ແກ່ ຂ່າ, ຫົວສີໄຄ ແລະຫົວກະທຽມ ໄປປະສົມກັບສ່ວນປະສົມອື່ນອີກເລັກໜ້ອຍ ກໍຈະໄດ້ນໍ້າຢາທີ່ສາມາດກໍາຈັດປວກຢ່າງໄດ້ຜົນ
ສ່ວນປະສົມ
– ຂ່າ ເຄິ່ງໂລ
– ຫົວສີໄຄ ເຄິ່ງໂລ
– ກະທຽມ ເຄິ່ງໂລ
– ນໍ້າສົ້ມສາຍຊູ ເຄິ່ງແກ້ວ
– ເຫຼົ້າຂາວ ເຄິ່ງແກ້ວ
– ນໍ້າ 10 ລິດ
ວິທີເຮັດ: ເອົາຂ່າ, ຫົວສີໄຄ, ກະທຽມ ມາຟັກເປັນຕ່ອນນ້ອຍ ແລ້ວເອົາມາປະສົມກັນ ຈາກນັ້ນເອົານໍ້າສົ້ມສາຍຊູ, ເຫຼົ້າຂາວ, ນໍ້າ ລົງໄປປະສົມກັນ ແລ້ວເອົາໄປໃສ່ພາຊະນະເກັບໝັກໄວ້ປະມານ 1 ອາທິດ ກໍຈະໄດ້ນໍ້າຢາສະໝຸນໄພ ທີ່ສາມາດກຳຈັດປວກໃຫ້ອອກຈາກເຮືອນເຮົາໄປ
ວິທີການກຳຈັດ: ເອົານໍ້າຢາທີ່ເຮົາໝັກໄວ້ປະມານ 1 ຈອງ ປະສົມກັບນໍ້າ 1 ລິດ ແລ້ວເອົາໄປຖອກລົງບໍລິເວນທີ່ມີປວກ ຫຼືບ່ອນທີມີຮັງປວກ, ນໍ້າຢາຈະອອກລິດ ເຮັດໃຫ້ປວກໜີພ່າຍອອກຈາກບໍລິເວນນັ້ນ ແລະໃນກໍລະນີຫາກເຮືອນຍັງບໍ່ມີປວກ ກໍສາມາດເຮັດເພື່ອປ້ອງກັນໄວ້ ເອົາສ່ວນປະສົມໄປຖອກອ້ອມເຮືອນ ເພື່ອປ້ອງກັນປວກມາລົບກວນ
ວິທີນີ້ ຄວນເຮັດຕະຫຼອດ ຫຼືອາດຈະໃຊ້ນໍ້າຢາຖອກລົງບໍລິເວນອ້ອມເຮືອນອາທິດລະຄັ້ງ ຫຼືເດືອນລະຄັ້ງ ເພື່ອປ້ອງກັນປວກ ແລະເປັນສະໝຸນໄພທີ່ເປັນມິດກັບສິ່ງແວດລ້ອມ ປອດໄພຕໍ່ຄົນ ແລະສັດລ້ຽງອີກດ້ວຍ