ບໍລິສັດລັດ ວິສາຫະກິດລາວ ໂທລະຄົມມະນາຄົມ ສະຫລຸບຜົນງານ ການເຄື່ອນໄຫວວຽກ ງານ ປະຈຳປີ 2016 ຂຶ້ນໃນວັນທີ 8 ກຸມພາ 2017 ທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ຖາວອນ ສົມສະກຸນ ຜູ້ອຳນວຍການໃຫຍ່ ບໍລິສັດ ວິສາຫະກິດລາວ ໂທລະຄົມມະນາຄົມ, ໃຫ້ກຽດເຂົ້າຮ່ວມໂດຍ ທ່ານ ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ສື່ສານ ແລະ ພະນັກງານທົ່ວປະເທດ ເຂົ້າຮ່ວມ.
ທ່ານ ຖາວອນ ສົມສະກຸນ ຜູ້ອຳນວຍການໃຫຍ່ ບໍລິສັດ ວິສາຫະກິດລາວ ໂທລະຄົມມະນາຄົມ ໄດ້ຂຶ້ນຜ່ານສະຫລຸບຜົນງານ ການເຄື່ອນໄຫວວຽກງານ ດຳເນີນທຸລະກິດປີ 2016 ແລະ ທິດທາງແຜນ ການ ໃນປີ 2017 ເຊິ່ງໄດ້ຍົກໃຫ້ເຫັນຜົນງານ ອັນພົ້ນເດັ່ນຫລາຍດ້ານ ທີ່ຍາດມາໄດ້ ໃນໜຶ່ງປີຜ່ານມາເຊັ່ນ: ໄດ້ລົງທຶນຂະຫຍາຍຕາໜ່າງ ລະບົບໂທລະຄົມມະນາຄົມ ມູນຄ່າ 44,4 ລ້ານໂດລາສະຫະລັດ ໃນນັ້ນ ມີລະບົບໂທລະສັບມືຖື 39,9 ລ້ານໂດລາສະຫະລັດ, ລະບົບສາຍສົ່ງ 1,7 ລ້ານໂດລາສະຫະລັດ, ອິນເຕີເນັດ ແລະ ອື່ນໆ 2,7 ລ້ານໂດລາສະຫະລັດ; ມາຮອດປັດຈຸບັນ ມີລູກຄ້າໃຊ້ໂທລະສັບມືຖື ໃນລະບົບ ຫລາຍກວ່າ 1.500.000 ເລກໝາຍ, ໂທລະສັບຕັ້ງໂຕະ ຫລາຍກວ່າ 40.000 ເລກໝາຍ, ໂທລະສັບວິນໂຟນ ຫລາຍກວ່າ 530.000 ເລກໝາຍ ແລະ ອິນເຕີເນັດຫລາຍກວ່າ 890.000 ລູກຄ້າ; ສາມາດສ້າງລາຍຮັບໄດ້ 1.810,1 ຕື້ກັບ, ເພີ່ມຂຶ້ນຈາກປີ 2015 ເທົ່າກັບ 9% ໃນນັ້ນ ມີກຳໄລສຸດທິ 365 ຕື້ກີບ. ສາມາດປະຕິບັດ ພັນທະໃຫ້ລັດຖະບານ 490 ຕື້ກວ່າກີບ ເຊິ່ງກວມເອົາອັດຕາສ່ວນ 32,8% ຂອງລາຍຮັບທີ່ລາວໂທລະຄົມ ປະຕິບັດໄດ້ໃນປີ 2016 ນອກຈາກນີ້ ຍັງໄດ້ປັບປຸງລະບຽບ, ນະໂຍບາຍ ສະຫວັດດີການສັງຄົມຕ່າງໆ ເພື່ອຍົກສູງລະດັບຊີວິດການເປັນຢູ່ ໃຫ້ພະນັກງານໃຫ້ດີຂຶ້ນເລື້ອຍໆ ໄປຄຽງຄູ່ກັບ ການດຳເນີນທຸລະກິດ ແລະ ປະກອບສ່ວນຊ່ວຍເຫລືອ ແລະ ອຸປະຖຳຕໍ່ອົງການຈັດຕັ້ງ ພັກ-ລັດ ແລະ ສັງຄົມເປັນມູນຄ່າ 4,1 ຕື້ກວ່າກີບ.
ສຳລັບແຜນການປີ 2017 ນີ້ ລາວໂທລະຄົມ ຈະສູ້ຊົນສ້າງຖານລູກຄ້າ ໃຫ້ໄດ້ 3,2 ລ້ານເລກໝາຍ ແລະ ສ້າງລາຍຮັບ ໃຫ້ໄດ້ປະມານ 1.960,2 ຕື້ກີບ, ທຽບໃສ່ປີ 2016 ເພີ່ມຂຶ້ນ 9% ຄາດຄະເນກຳໄລສຸດທິ ໃຫ້ໄດ້ 422,1 ຕື້ກີບ ເພີ່ມຂຶ້ນ15,7% ແລະ ຄາດຄະເນ ຈະສາມາດມອບພັນທະ ໃຫ້ລັດຖະບານ ຈຳນວນ 542,4 ຕື້ກີບ ກວມເອົາຫລາຍກວ່າ 32% ຂອງລາຍຮັບທັງໝົດ ນອກນີ້ຍັງໄດ້ລົງທຶນໃສ່ ຂະຫຍາຍຕາໜ່າງລະບົບ ໂທລະຄົມມະນາຄົມ ເພື່ອຮັບປະກັນ ທາງດ້ານປະລິມານ ແລະ ຄຸນນະພາບ, ຮັບປະກັນຂໍ້ມູນ ມີຄວາມປອດໄພ ແລະ ເປັນລະບົບທັນສະໄໝ ເພື່ອຮັບປະກັນ ໃຫ້ແກ່ການບໍລິການສັງຄົມ.
ຂ່າວ: ສຳນັກຂ່າວສານປະເທດລາວ