ໃນວັນທີ 8 ກຸມພາ 2017ຜ່ານມານີ້ ທ່ານ ທ່ຽງ ບຸບຜາ, ອະດີດເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳສະຫະພັນຣັດເຊຍ ໄດ້ຮັບຫລຽນຍ້ອງຍໍ ຂອງກະຊວງການຕ່າງປະເທດ ຣັດເຊຍ, ໂດຍພິທີດັ່ງກ່າວ ໄດ້ຈັດຂຶ້ນທີ່ ສະຖານທູດຣັດເຊຍ ທີ່ນະຄອນຫລວງວຽງຈັນ, ມອບໂດຍ ທ່ານ ມິຄາອີນ ບາຣານນົບ, ເອກອັກຄະລັດຖະທູດ ແຫ່ງ ສະຫະພັນຣັດເຊຍ ປະຈຳ ສປປ ລາວ, ໂດຍມີ ທ່ານ ບຸນເຫລືອ ພັນດານຸວົງ ຫົວໜ້າຫ້ອງການ ກະຊວງການຕ່າງປະເທດ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງເຂົ້າຮ່ວມ ເປັນສັກຂີພິຍານ.
ທ່ານ ທ່ຽງ ບຸບຜາ ມີຜົນງານໃນໄລຍະ ປະຕິບັດໜ້າທີ່ການທູດ ຢູ່ ສະຫະພັນຣັດເຊຍ ແຕ່ປີ 2011-2016 ທີ່ໄດ້ປະກອບສ່ວນ ຢ່າງຕັ້ງໜ້າເຂົ້າໃນ ການຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບທີ່ເປັນມູນເຊື້ອ ແລະ ມີການຮ່ວມມືທີ່ຍາວນານ ລະຫວ່າງ ລາວ-ຣັດເຊຍ ມີບາດກ້າວຂະຫຍາຍຕົວ ຕໍ່ເນື່ອງຕະຫລອດມາ. ອັນພົ້ນເດັ່ນແມ່ນ ການຊຸກຍູ້ ໃຫ້ມີການແລກປ່ຽນ ການຢ້ຽມຢາມໄປມາຫາສູ່ກັນ ລະຫວ່າງ ການນຳຂັ້ນສູງຂອງ ສປປ ລາວ ແລະ ສະຫະພັນຣັດເຊຍ ຢ່າງເປັນປົກກະຕິ, ເຊິ່ງມາໃນໄລຍະໃໝ່ ການພົວພັນຮ່ວມມື ຂອງສອງປະເທດ ລາວ-ຣັດເຊຍ ໄດ້ກ້າວຂຶ້ນສູ່ ລະດັບໃໝ່ ເປັນປະເທດຄູ່ຮ່ວມມື ຍຸດທະສາດນຳກັນ.
ຄຽງຄູ່ກັບການຮ່ວມມື ທາງດ້ານການເມືອງແລ້ວ ທ່ານ ທ່ຽງ ບຸບຜາ ຍັງມີບົດບາດ ປະກອບສ່ວນຊຸກຍູ້ການຮ່ວມມື ດ້ານເສດຖະກິດ-ການຄ້າ, ການທ່ອງທ່ຽວ, ການສຶກສາ-ວັດທະນະທຳ ແລະ ດ້ານອື່ນໆ. ຕໍ່ຜົນງານ ແລະ ຄຸນງາມຄວາມດີ ໃນການປະກອບສ່ວນ ຢ່າງຫ້າວຫັນດັ່ງກ່າວ ກະຊວງການຕ່າງປະເທດ ສະຫະພັນຣັດເຊຍ ຈຶ່ງໄດ້ມອບຫລຽນຍ້ອງຍໍ ໃຫ້ແກ່ທ່ານ ທ່ຽງ ບຸບຜາ ອະດີດເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສະຫະພັນຣັດເຊຍ ໃນໂອກາດສຳເລັດການປະຕິບັດການທູດ ຢູ່ສະຫະພັນຣັດເຊຍ.
ຂ່າວ: ສຳນັກຂ່າວສານປະເທດລາວ