ໃນວັນທີ 7 ກຸມພາ 2017 ຜ່ານມານີ້ ບໍລິສັດ ອີດີແອວ-ເຈັນ ໂຊລາ ພາວເວີ້ ຈຳກັດ ຈັດພິທີເປີດໂຮງງານຜະລິດໄຟຟ້າພະລັງງານແສງຕາເວັນ ທີ່ບ້ານແຈ້ງສະຫວ່າງ ເມືອງນາຊາຍທອງ ໂດຍມີທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍບັນດາລັດຖະມົນຕີ ຮອງລັດຖະມົນຕີ ຕາງໜ້າຈາກເອກອັກຄະລາຊະທູດໄທ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂຮງງານຜະລິດໄຟຟ້າພະລັງງານແສງຕາເວັນແຫ່ງທຳອິດຂອງ ສປປ ລາວ ທີ່ມີກຳລັງການຕິດຕັ້ງຂະໜາດ 3 ເມກາວັດ ຕັ້ງຢູ່ບ້ານແຈ້ງສະຫວ່າງ ເມືອງນາຊາຍທອງ ນະຄອນຫຼວງວຽງຈັນ ເຊິ່ງໂຮງງານຜະລິດໄຟຟ້າແຫ່ງນີ້ ໄດ້ກາຍເປັນສະຖານທີ່ຜະລິດໄຟຟ້າພະລັງງານທົດແທນທີ່ສະອາດ ແລະ ເປັນມິດກັບສິ່ງແວດລ້ອມ ຮອດປີ 2025 ລັດຖະບານລາວ ຈະຊຸກຍູ້ໃຫ້ຊັດສ່ວນການຊົມໃຊ້ພະລັງງານທົດແທນກວມເອົາ 30% ຂອງພະລັງງານຊົມໃຊ້ທັງໝົດ ໃນນັ້ນ ຄາດວ່າພະລັງງານທົດແທນຈາກແສງຕາເວັນ ຈະມີບໍ່ຕ່ຳກວ່າ 144 ເມກາວັດໂມງ.
ທ່ານນາງ ລັດຕະນະ ປະທຸມວັນ ປະທານສະພາບໍລິຫານບໍລິສັດ ອີດີແອວ-ເຈັນ ໂຊລາ ພາວເວີ້ ຈຳກັດ ກ່າວວ່າ: ໂຮງງານແຫ່ງນີ້ ແມ່ນການຮ່ວມທຶນລະຫວ່າງບໍລິສັດ ຜະລິດໄຟຟ້າລາວ ມະຫາຊົນ ຖືຮຸ້ນ 60% ແລະ ບໍລິສັດ ພັດທະນາພະລັງງານບໍລິສຸດ ຈຳກັດຜູ້ດຽວ ຖືຮຸ້ນ 40% ດ້ວຍມູນຄ່າການລົງທຶນທັງໝົດ 3,41 ລ້ານໂດລາສະຫະລັດ ໃນເນື້ອທີ່ຕິດຕັ້ງແຜງໂຊລາ ທັງໝົດ 6 ເຮັກຕາ ເຊິ່ງການກໍ່ສ້າງໄດ້ເລີ່ມແຕ່ທ້າຍປີ 2015 ເປັນຕົ້ນມາ ປັດຈຸບັນໂຮງງານມີກຳລັງຕິດຕັ້ງຂະໜາດ 3 ເມກາວັດ ແລະ ຈະເພີ່ມກຳລັງການຕິດຕັ້ງໃຫ້ເປັນ 10 ເມກາວັດໃນຕໍ່ໜ້າ ໂດຍການຜະລິດໄຟຟ້າທັງໝົດ ແມ່ນຈະຂາຍເຂົ້າສູ່ລະບົບຂອງລັດວິສາຫະກິດໄຟຟ້າລາວ ຕາມສັນຍາຊື້ຂາຍ ໃນລະດັບແຮງດັນ 22 ກິໂລວັດ.
ປັດຈຸບັນ ທົ່ວປະເທດມີແຫຼ່ງຜະລິດພະລັງງານໄຟຟ້າທີ່ສຳເລັດແລ້ວ ຈຳນວນ 43 ແຫ່ງ ມີກຳລັງການຕິດຕັ້ງທັງໝົດ 6.300 ກວ່າເມກາວັດ ສາມາດຜະລິດພະລັງງານໄດ້ 33.000 ກວ່າກິໂລວັດໂມງ ມີລະບົບສາຍສົ່ງທັງໝົດ 55.000 ກວ່າກິໂລແມັດ ສະຖານີໄຟຟ້າທັງໝົດ 55 ແຫ່ງ ແລະ ມີຈຳນວນບ້ານທີ່ໄດ້ຊົມໃຊ້ໄຟຟ້າເຖິງ 86,50%.
ແຫຼ່ງຂ່າວ: ໜັງສືພິມ ວຽງຈັນໃໝ່