ທະນາຄານໂລກ ໃຫ້ລາວກູ້ຢືມເງິນ 25 ລ້ານໂດລາສະຫະລັດ ເພື່ອປັບປຸງເສັ້ນທາງຢູ່ 6 ແຂວງ

0
2424

​ໃນວັນ​ທີ 7 ກຸມພາ 2017 ຜ່ານມານີ້ ທີ່​ນະຄອນຫລວງ​ວຽງຈັນ ທະນາຄານ​ໂລກ ​​ໄດ້​ຕົກລົງ​ໃຫ້ ເງິນ​ກູ້​ຢືມທີ່​ມີດ​ອກ​ເບ້ຍ​ຕ່ຳ ​ແກ່​ລັດຖະບານ​ລາວ ​ໃນ​ວົງ​ເງິນ 25 ລ້ານ​ໂດ​ລາ​ສະຫະລັດ ​ເພື່ອ​ສືບ​ຕໍ່ປະຕິບັດ​​ໂຄງການໄລຍະ II ​ໃນ​ການສ້າງ​ຄວາມ​ເຂັ້ມ​ແຂງ​ລະບົບ​ບຳລຸງ​ຮັກສາ​ເສັ້ນທາງ ​ແລະ ປັບປຸງ​ການ​ເຊື່ອມ​ຕໍ່ ຂອງ​ລະບົບ​ເສັ້ນທາງ​ໃນ 6 ​ແຂວງ​ພາກ​ກາງ ​ແລະ ພາກ​ເໜືອ​ຂອງ​ລາວ ​ໂດຍມີ​ການລົງ​ນາມ​ລະຫວ່າງ ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ​ໂຍທາ​ທິການ ​ແລະ ຂົນ​ສົ່ງ ​ແລະ ທ່ານ ອູ​ລິກ ຊະ​ຄາວ ຜູ້ ອຳນວຍການທະນາຄານ​ໂລກ​ ປະຈຳປະ​ເທ​ດ​ໃນ​ພາກ​ພື້ນ​ອາຊີ​ຕາ​ເວັນ​ອອກສ່ຽງ​ໃຕ້ ​​ເຂົ້າ​ຮ່ວມ​​ເປັນ​ສັກຂີ​ພິຍານ​ ຂອງທ່ານ​ນາງ ທິບ​ພະ​ກອນ ຈັນທະ​ວົງສາ ຮອງ​ລັດຖະມົນຕີ​ກະຊວງ​ການ​ເງິນ ​ແລະພາກສ່ວນ​ທີ່​ກ່ຽວຂ້ອງ​ ທັງ​ສອງ​ຝ່າຍ​ເຂົ້າ​ຮ່ວມ.

ການ​ປະຕິບັດ​ໂຄງການ​ໄລຍະ II ນີ້ ຈະ​ຊ່ວຍ​ສຸມ​ໃສ່​ບູລະນະຮັກສາ​ເສັ້ນທາງໃນ 6 ​​ແຂວງ ​ທີ່​ມີ​ຄວາມ​ສ່ຽງສູງ ຕໍ່​ຜົນ​ກະທົບ​ຈາກ​ນ້ຳ​ຖ້ວມ, ດິນ​ເຈື່ອນ ​ແລະ ​ໄພພິບັດ​ທຳ​ມະ​ຊາດ​ອື່ນໆ  ​ເຊິ່ງລວມມີ​ແຂວງ ​ຜົ້ງ​ສາລີ, ຫົວພັນ, ອຸດົມ​ໄຊ, ຊຽງຂວາງ, ​ໄຊ​ຍະ​ບູລີ ​ແລະ ​ແຂວງ ບໍລິ​ຄຳ​ໄຊ ​ເຊິ່ງ​ຈະ​​ເຮັດໃຫ້ເສັ້ນທາງ​ມີ​ສະພາບ​ດີ ​ແລະ ປອດ​ໄພຫລາຍຂຶ້ນ​ກວ່າ​ເກົ່າ. ການ​ຊ່ວຍ​ເຫລືອ​ດັ່ງກ່າວ​, ຈະ​​ຮັບປະກັນການ​ເຂົ້າ​ເຖິງ​ການ​ບໍລິການ​ທີ່​ເປັນ​ພື້ນຖານ, ​ໂຮງຮຽນ ​ແລະ ຕະຫລາດຂອງ​ປະຊາຊົນ​ຫລາຍ​ກວ່າ 1,6 ລ້ານ​ຄົນ​ ໃນສປປ ລາວ ​​ແລະ ຈະເຮັດ​ໃຫ້​ປະຊາຊົນ​ໃນ​ເຂດ​ຊົນນະບົດ ​ໄດ້​ຮັບ​ຜົນ​ປະ​ໂຫຍ​ດຈາກ​ເສັ້ນທາງຫລາຍ​ເພິ່ມ​ຂຶ້ນ.

ສປປ ລາວ ​ເປັນໜຶ່ງ​ໃນ​ປະ​ເທດ​ສະມາຊິກ​ອາຊຽນ ທີ່​ມີ​ຄວາມ​ສ່ຽງສູງ​ຕໍ່​ໄພ​ນ້ຳ​ຖ້ວມ, ​ໄພ​ແລ້ງ ​ແລະ ພາຍຸ ​ເຊິ່ງພື້ນຖານ​ໂຄງ​ລ່າງ​ຂອງ​ປະ​ເທດ​ເຫລົ່າ​ນີ້​ ມັກ​ຖືກ​ກະທົບ​ຈາກ​ການ​ເພີ່ມຂຶ້ນ​ຂອງ​ຄວາມ​ຖີ່ ​ແລະ ຄວາມ​ຮຸນ​ແຮງ ຂອງ​ໄພພິບັດ​ທຳ​ມະ​ຊາດ ​ເນື່ອງ​ຈາກ​ການ​ປ່ຽນ​ແປງດ້ານ​ສະພາບ​ດິນ​ຟ້າ​ອາກາດ.

ຂ່າວ: ສຳນັກຂ່າວສານປະເທດລາວ