ເວັບໄຊຂ່າວເດິຄັຟເວີ່ ຂອງປະເທດຈີນລາຍງານເມື່ອວັນທີ 5 ກຸມພາ 2017 ຜ່ານມາວ່າໃນເວລາປະມານ 17:26 ໂມງ ຕາມເວລາທ້ອງຖິ່ນ ໄດ້ເກີດເຫດໄຟໄໝ້ຮ້ານ ນວດຕີນ ແຫ່ງໜຶ່ງຢູ່ເມືອງ ທຽນໄຖ ມົນທົນເຈີ້ຈຽງ ທາງພາກຕາເວັນອອກຂອງຈີນ ເຮັດໃຫ້ມີພະນັກງານ ແລະລູກຄ້າຫຼາຍຄົນຕ້ອງໂດດອອກມາທາງປ່ອງຢ້ຽມ ເພື່ອເອົາຕົວລອດ ເຊິ່ງເຫດໄຟໄໝ້ດັ່ງກ່າວ ເຮັດໃຫ້ມີຜູ້ເສຍຊີວິດຢ່າງໜ້ອຍ 18 ຄົນ ແລະບາດເຈັບອີກ 18 ຄົນ
ສຳນັກຂ່າວຊິນຫົວລາຍງານຕື່ມວ່າ ເຫດໄຟໄໝ້ດັ່ງກ່າວ ມີຜູ້ເສຍຊີວິດປະມານ 18 ຄົນ ເຊິ່ງເສຍຊີວິດໃນບ່ອນເກີດເຫດ 8 ຄົນ ແລະເສຍຊີວິດຢູ່ໂຮງໝໍ 10 ຄົນ, ຍັງມີຜູ້ທີ່ໄດ້ຮັບບາດເຈັບອີກ 18 ຄົນ ອາການສາຫັດ 2 ຄົນ ສ່ວນສາເຫດຍັງຢູ່ໃນການກວດສອບ
ຕຶກທີ່ຖືກໄຟໄໝ້ນີ້ ເປັນຕຶກ 6 ຊັ້ນ ເຊິ່ງຊັ້ນ 1-2 ເປີດເປັນຮ້ານ ນວດຕີນ, ສ່ວນຊັ້ນອື່ນໆ ເປັນບ່ອນພັກຂອງປະຊາຊົນ ເຊິ່ງເຈົ້າໜ້າທີ່ໄດ້ອົບພະຍົບອອກມາຈາກຕຶກໂດຍປອດໄພແລ້ວ