ຂປລ. ໃນວັນທີ 2 ກຸມພາ 2017 ທີ່ນະຄອນຫລວງວຽງຈັນ, ລັດວິສາຫະກິດໄຟຟ້າລາວ ແລະ ທະນາຄານກະສິກອນໄທ ໄດ້ເຊັນສັນຍາເງິນກູ້ ເພື່ອຂະຫຍາຍລະບົບສາຍສົ່ງໄຟຟ້າ ສູ່ຊົນນະບົດເຂດຫ່າງໄກສອກຫລີກ, ເຊື່ອມຕໍ່ລະບົບໄຟຟ້າທົ່ວປະເທດ ແລະ ເພື່ອນບ້ານໃກ້ຄຽງ.
ພິທີເຊັນດັ່ງກ່າວ ໂດຍໃຫ້ກຽດເຂົ້າຮ່ວມຂອງ ທ່ານ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ບຸນອຸ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດ ໄຟ້ຟ້າລາວ ແລະ ທ່ານ ພັດຊະລະ ສະມະລາພາ ຮອງກຳມະການຜູ້ຈັດການຜູ້ອາວຸໂສ ທະນະຄານກະສິກອນໄທ.
ທ່ານ ບຸນອຸ້ມ ສີວັນເພັງ ໄດ້ກ່າວວ່າ: ໂຄງການດັ່ງກ່າວ ເປັນການຮ່ວມມືຂອງ ທະນາຄານກະສິກອນໄທ ໂດຍສອດຄ່ອງກັບວິໄສທັດ ຂອງ ລັດວິສາຫະກິດໄຟຟ້າລາວ ໃນການດຳເນີນນະໂຍບາຍ ດ້ານການພັດທະນາ ແລະ ບໍລິຫານພະລັງງານໄຟຟ້າແບບຍືນຍົງ ແລະ ເປັນມິດກັບສິ່ງແວດລ້ອມ ເຊິ່ງການຮ່ວມມືດັ່ງກ່າວ ແມ່ນມີປະໂຫຍດຫລາຍດ້ານ ໃນການພັດທະນາລະບົບສາຍສົ່ງໄຟຟ້າ ລົງສູ່ຊົນນະບົດ ເຂດຫ່າງໄກສອກຫລີກ ພ້ອມທັງເປັນການເຊື່ອມຕໍ່ລະບົບໄຟຟ້າໃນທົ່ວປະເທດ ໄດ້ຢ່າງທົ່ວເຖິງ ແລະ ເຮັດໃຫ້ສາມາດສົ່ງອອກພະລັງງານໄຟຟ້າສ່ວນທີ່ເຫລືອ ໄປຍັງປະເທດໃກ້ຄຽງ. ນອກຈາກນັ້ນ ຍັງເປັນປະໂຫຍດຕໍ່ ສປປ ລາວ ແລະ ໄທ ໃນການສ້າງຄວາມໝັ້ນຄົງຂອງຂະແໜງໄຟຟ້າ, ການລົງທຶນປະເທດ ແລະ ສ້າງສາຍສຳພັນອັນແໜ້ນແຟ້ນລະຫວ່າງປະເທດ.
ນອກຈາກນີ້ ທ່ານຜູ້ອຳນວຍການໃຫຍ່ ລັດວິສາຫະກິດ ໄຟ້ຟ້າລາວ ຍັງໄດ້ກ່າວຕື່ມອີກວ່າ: ການຮ່ວມມືດັ່ງກ່າວ ແມ່ນມີຄວາມສຳຄັນ ໃນການພັດທະນາພື້ນຖານໂຄງລ່າງ ເພື່ອຮອງຮັບການເຕີບໃຫຍ່ຂະຫຍາຍຕົວຂອງ ເສດຖະກິດ-ສັງຄົມຂອງຊາດ ໂດຍສະເພາະ ແມ່ນດ້ານຂະແໜງອຸດສາຫະກຳ ພະລັງງາານໄຟຟ້າໃນ ສປປ ລາວ ທີ່ມີຄວາມໂດດເດັ່ນ ໃນຖານະຜູ້ຜະລິດ ແລະ ສົ່ງອອກພະລັງງານໄຟຟ້າ ໄປຍັງປະເທດໃກ້ຄຽງ.
ແຫລ່ງຂ່າວ:
