ໃນວັນທີ 1 ກຸມພາ 2017 ຜ່ານມານີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະລົງຢ້ຽມຢາມໂຄງການເຂື່ອນໄຟຟ້ານ້ຳງຽບ 1 ທີ່ບ້ານຫາດຍື້ນ ເມືອງບໍລິຄັນ ແຂວງບໍລິຄໍາໄຊ ເພື່ອເບິ່ງຄວາມຄືບໜ້າຂອງການກໍ່ສ້າງ ແລະວຽກງານພັດທະນາສັງຄົມຂອງໂຄງການ.
ທ່ານ ໂຢຊິຮິໂຣ ຢາມາບາຢາຊິ (Yoshihiro Yamabayashi) ຜູ້ອຳນວຍການຂອງບໍລິສັດ ໄຟຟ້ານ້ຳງຽບ 1 ລາຍງານວ່າ: ໂຄງການໄຟຟ້ານ້ຳງຽບ 1 ມີກໍາລັງຕິດຕັ້ງປະມານ 290 ເມກາວັດ ຊຶ່ງກໍາລັງດໍາເນີນການກໍ່ສ້າງ ຢູ່ແຂວງບໍລິຄຳໄຊ ແລະແຂວງໄຊສົມບູນ ໂດຍປະກອບມີການກໍ່ສ້າງ ເຂື່ອນສອງເຂື່ອນ ແລະ ເຮືອນຈັກຜະລິດໄຟຟ້າສອງເຮືອນ. ໂຄງການດັ່ງກ່າວໄດ້ເລີ່ມລົງມືກໍ່ສ້າງ ມາແຕ່ທ້າຍປີ 2014 ແລະມາຮອດທ້າຍປີ 2016 ມີຄວາມຄືບໜ້າປະມານ 60,30% ແລະ ຄາດວ່າໃນທ້າຍປີ 2017 ການກໍ່ສ້າງໂຄງການ ຈະສໍາເລັດປະມານ 90%
ໂຄງການແມ່ນຢູ່ພາຍໃຕ້ ການຄວບຄຸມການກໍ່ສ້າງ ແລະດໍາເນີນງານຂອງບໍລິສັດໄຟຟ້າ ນໍ້າງຽບ 1 ຊຶ່ງປະກອບມີສາມຂາຮຸ້ນຄື: ບໍລິສັດຄັນໄຊການໄຟຟ້າແຫ່ງປະເທດຍີ່ປຸ່ນ (Kansai Electric Power), ການໄຟຟ້າຝ່າຍຜະລິດແຫ່ງປະເທດ ໄທ (EGAT) ແລະລັດວິສາຫະກິດຖືຮຸ້ນລາວ (LHSE). ໂຄງການຈະເລີ່ມຜະລິດ ໄຟຟ້າໃນເດືອນມັງກອນປີ 2019 ແລະກະແສໄຟຟ້າປະມານ 95% ຈະຂາຍສົ່ງໃຫ້ປະເທດໄທ ແລະ ສ່ວນທີ່ເຫຼືອຈະນຳມາຊົມໃຊ້ພາຍໃນປະເທດ ຊຶ່ງຄາດວ່າຈະສ້າງລາຍຮັບໂດຍກົງ ໃຫ້ແກ່ລັດຖະບານລາວໄດ້ຫຼາຍກວ່າ 600 ລ້ານໂດລາສະຫະລັດ (4.800 ຕື້ກີບ) ພ້ອມທັງຜົນປະໂຫຍດທາງອ້ອມຈຳນວນໜຶ່ງອີກ ໃນໄລຍະສຳປະທານ 27 ປີ ແລະ ຫຼັງຈາກນັ້ນ ໂຄງການຈະຖືກໂອນມາເປັນ ກຳມະສິດຂອງລັດຖະບານ ແຫ່ງ ສປປ ລາວ.
ຂ່າວ: ໜັງສືພິມ ປະຊາຊົນ