ສຳນັກຂ່າວຕ່າງປະເທດລາຍງານເມື່ອວັນທີ 2 ກຸມພາ 2017 ຜ່ານມາວ່າ ໄດ້ເຫດໄຟໄໝ້ໂຮງງານແຫ່ງໜຶ່ງຢູ່ຟີລິບປິນ ເຊິ່ງໂຮງງານຕັ້ງຢູ່ເມືອງເຈເນີຣັລ ໄທຣອັສ ຢູ່ແຂວງຄາໄວ ຖືກໄຟໄໝ້ ເປັນເຫດເຮັດໃຫ້ກຳມະກອນຈຳນວນຫຼາຍຕ່າງກໍພາກັນແລ່ນໜີເອົາຕົວລອດ ຈາກເຫດການດັ່ງກ່າວນັ້ນ ສົ່ງຜົນເຮັດໃຫ້ມີຜູ້ບາດເຈັບ 100 ກວ່າຄົນ ແລະສູນຫາຍອີກ 3 ຄົນ
ທ່ານ ຈີຊັສ ຄຣິສປິນ ເຣມຸນ ເຜີຍວ່າ ໂຮງງານແຫ່ງນີ້ ບາງສ່ວນໃຊ້ຜະລິດສົ່ງອອກໄປປະເທດຍີ່ປຸ່ນ ເຊິ່ງໃນຂະນະເກີດເຫດມີພະນັກງານຢູ່ໃນ 1/3 ຂອງຈຳນວນທັງໝົດ 15,000 ຄົນ ເຊິ່ງເບື້ອງຕົ້ນທາງເຈົ້າໜ້າທີ່ດັບເພີງສາມາດຄວບຄຸມແປວໄຟໄດ້ແລ້ວ ແຕ່ຍັງບໍ່ສາມາດດັບໄຟທີ່ລຸກໄໝ້ ຕ້ອງໃຊ້ເວລາເຖິງ 18 ຊົ່ວໂມງ ຈຶ່ງສາມາດດັບໄຟໄດ້ ເຊິ່ງຜູ້ບາດເຈັບຈໍານວນ 10 ຄົນມີອາການສາຫັດ ເພາະວ່າບາງຄົນໂດດໜີອອກມາທາງປ່ອງຢ້ຽມຂອງຕຶກສູງ 3 ຊັ້ນ ສ່ວນສາເຫດຂອງການເກີດເຫດໃນຄັ້ງນີ້ ເຈົ້າໜ້າທີ່ກຳລັງເລັ່ງສືບສວນ