ໃນວັນທີ 1 ກຸມພາ 2017 ຜ່ານມານີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງມາຢ້ຽມຍາມ ແລະ ເຮັດວຽກຢູ່ແຂວງບໍລິຄຳໄຊ ໂດຍໃຫ້ກຽດຕ້ອນຮັບຂອງ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມບັນດາພະນັກງານ ນຳພາຫລັກແຫລ່ງຂັ້ນແຂວງ, ຂັ້ນເມືອງ, ພະແນກການ ກຳລັງປ້ອງກັນຊາດ-ປ້ອງກັນຄວາມສະຫງົບເຂົ້າຮ່ວມຢ່າງພ້ອມພຽງ.
ທ່ານ ກອງແກ້ວ ໄຊສົງຄາມ ໄດ້ລາຍງານກ່ຽວກັບ ສະພາບການຕໍ່ ນາຍົກ ຮັບຊາບວ່າ: ແຂວງບໍລິຄຳໄຊ ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວ ຢ່າງຕໍ່ເນື່ອງ-ໝັ້ນທຽ່ງ, ວັດທະນະທຳ-ສັງຄົມ ໄດ້ຮັບການບູລະນະ, ຊີວິດການເປັນຢູ່ຂອງພະນັກງານ-ລັດຖະກອນ ຕະຫຼອດຮອດພໍ່ແມ່ປະຊາຊົນບັນດາເຜົ່າ ທາງດ້ານວັດຖຸ ແລະ ຈິດໃຈໄດ້ຮັບການປັບປຸງ ນັບມື້ນັບດີຂຶ້ນ, ໃນສົກປີ 2015-2016 ລວມຍອດມູນຄ່າເພີ່ມຜະລິດຕະພັນພາຍໃນ (GDP) ຂອງແຂວງ 4.478,8 ຕື້ກີບ, ດ້ວຍອັດຕາການຂະຫຍາຍຕົວ 8%, ສະເລ່ຍໃສ່ຫົວຄົນບັນລຸ 1.982 ໂດລາ. ໃນນັ້ນແຂວງບໍລິຄຳໄຊ ໄດ້ວາງວິໄສທັດດ້ານການ ພັດທະນາແຕ່ນີ້ຫາປີ 2030 ຄື “ສ້າງແຂວງ ບໍລິຄຳໄຊ ເປັນປະຕູເສດຖະກິດ ແຫຼ່ງຜະລິດພະລັງງານ ສູນກາງບໍລິການທາງຜ່ານ ແລະ ຄຸ້ມຄອງສິ່ງແວດລ້ອມແບບຍືນຍົງ“ ໃນນັ້ນໄດ້ຖືເອົາການພັດທະນາ ເສດຖະກິດເປັນໃຈກາງ, ຖືເອົາການພັດທະນາວັດທະນາທຳ-ສັງຄົມເປັນສຳຄັນ, ຖືເອົາການພັດທະນາຊັບພະຍາກອນມະນຸດ ເປັນຂອດກຸນແຈ ແລະ ຖືເອົາການປົກປັກຮັກສາສິ່ງແວດລ້ອມເປັນວຽກທີ່ຈຳເປັນ.
ໃນໂອກາດດັ່ງກ່າວນີ້, ທ່ານ ນາຍົກລັດຖະມົນຕີ ກໍໄດ້ສະແດງຄວາມຍ້ອງຍໍຊົມເຊີຍ, ຕີລາສູງ ຕໍ່ຄະນະບໍລິງານພັກແຂວງ ທີ່ໄດ້ເອົາໃຈໃສ່ພ້ອມ ກັນພັດທະນາ ແຂວງ ບໍລິຄຳໄຊໃຫ້ ມີໃບໜ້າໃໝ່ ແລະ ມີທ່າກ້າວຂະຫຍາຍຕົວ ຢ່າງຕໍ່ເນື່ອງ, ພ້ອມເນັ້ນ ໃຫ້ຄະນະບໍລິຫານພັກແຂວງ ແຕ່ລະຂັ້ນ ຈົ່ງໄດ້ສືບຕໍ່ປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບສູງ ຜັນຂະຫຍາຍເນື້ອໃນ ມະຕິ 10 ຂອງພັກ ກໍ່ຄືຄຳສັ່ງຕ່າງໆ ແລະ ແຜນພັດທະນາ ເສດຖະກິດ-ສັງຄົມແຂວງ ໃຫ້ໜັກແໜ້ນ, ເກັບລາຍຮັບເຂົ້າງົບປະມານ ໃຫ້ໄດ້ຕາມຄາດໝາຍທີ່ວາງໄວ້, ຮັບປະກັນ ຄວາມໂປ່ງໃສ, ຍຸດຕິທາ, ອັດຊ່ອງຫວ່າງການຮົ່ວໄຫຼ, ຕ້ານການສໍ້ລາດບັງຫຼວງ ໃຫ້ໄດ້ຢ່າງຂາດຕົວ, ຫັນເອົາທ່າແຮງຂອງແຂວງ ທີ່ມີເຂົ້າໃນແຜນພັດທະນາ ເສດຖະກິດສັງຄົມ ໃຫ້ມີທ່າກ້າວ ຂະຫຍາຍຕົວຂຶ້ນຢ່າງບໍ່ຢຸດຢັ້ງ.
ຂ່າວ: ສຳນັກຂ່າວສານປະເທດລາວ