ລັດຖະບານແຫ່ງ ສປປ ລາວໄດ້ຕົກລົງອະນຸຍາດໃຫ້ບໍລິສັດ Power Holding Public co.ltd ຫລື TPC ຈາກປະເທດໄທ ເຂົ້າມາສຶກສາຄວາມເປັນໄປໄດ້ ຂອງໂຄງການກໍ່ສ້າງເຂື່ອນໄຟຟ້ານ້ຳຕົກ ເຊບັ້ງຫຽງ 1 ຢູ່ແຂວງສະຫວັນນະເຂດເປັນເວລາ 18 ເດືອນ ພາຍຫລັງສໍາຫລວດແລ້ວຈຶ່ງຈະເລີ່ມລົງມືກໍ່ສ້າງ, ເຊິ່ງໂຄງການດັ່ງກ່າວ ຈະເປັນລັກສະນະແບບຝາຍນ້ຳລົ້ນ, ຄາດວ່າກໍາລັງການຕິດຕັ້ງປະມານ 30-50 MW ມູນຄ່າການລົງທຶນປະມານ 3 ຕື້ບາດ ແລະ ຈະເລີ່ມລົງສໍາຫລວດປະມານ ທ້າຍເດືອນກຸມພາ 2017 ນີ້.
ພິທີເຊັນບົດບັນທຶກຄວາມເຂົ້າໃຈໂຄງການດັ່ງກ່າວ ໄດ້ຈັດຂຶ້ນໃນວັນທີ 2 ກຸມພາ 2017 ນີ້ຢູ່ກະຊວງແຜນການ ແລະ ການລົງທຶນ ລະຫວ່າງ ທ່ານຄໍາລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ນາງ ກະນົກທິບ ຈັນພະລັງສີ ປະທານກໍາມະການບໍລິຫານບໍລິສັດ Power Holding Public co.ltd ມີທ່ານ ສິນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ມີບັນດາຫົວໜ້າກົມ, ຮອງກົມ ແລະຫົວໜ້າພະແນກ, ຮອງພະແນກການກ່ຽວຂ້ອງ ຈາກແຂວງສະຫວັວນນະເຂດ ພ້ອມດ້ວຍພະນັກງານທີ່ກ່ຽວຂ້ອງ ທັງສອງຝ່າຍເຂົ້າຮ່ວມເປັນສັກຂີພິຍານ.
ຂ່າວ: ສຳນັກຂ່າວສານປະເທດລາວ