ໃນວັນທີ 1 ກຸມພາ 2017 ຜ່ານມານີ້, ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ ດັກມາ ເຈເວີກ ປະທານກໍາມາທິການ ຮ່ວມມືດ້ານເສດຖະກິດ ແລະ ການພັດທະນາລັດ ແຫ່ງສະພາເຢຍລະມັນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 31 ມັງກອນ ຫາ 2 ກຸມພາ 2017.
ໂອກາດດັ່ງກ່າວ, ທ່ານ ບຸນທອງ ຈິດມະນີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນ ທາງມາຢ້ຽມຢາມ ຂອງທ່ານນາງ ດັກມາ ເຈ ເວີກ ເຊິ່ງເປັນການປະກອບສ່ວນອັນສໍາຄັນ ໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ລາວ-ເຢຍລະມັນ ທີ່ມີມາແຕ່ດົນນານແລ້ວນັ້ນ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນໃນອະນາຄົດ.
ພ້ອມນັ້ນ ທ່ານນາງ ດັກມາ ເຈເວີກ ກໍໄດ້ສະແດງຄວາມຂອບໃຈຕໍ່ທ່ານ ບຸນທອງ ຈິດມະນີ ທີ່ໄດ້ສະຫລະເວລາອັນມີຄ່າ ຕ້ອນຮັບຄັ້ງນີ້ ພ້ອມທັງແຈ້ງຈຸດປະສົງ ຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານ ຮອງນາຍົກລັດຖະມົນຕີຊາບ
ຂ່າວ: ສຳນັກຂ່າວສານປະເທດລາວ