ສຳນັກຂ່າວຕ່າງປະເທດລາຍງານເມື່ອວັນທີ 31 ມັງກອນ 2017 ຜ່ານມາວ່າ ໃນຂະນະນີ້ ລັດຖະບານບັງກາລາເທດ ກຳລັງກຽມແຜນຍ້າຍບັນດາຜູ້ລີ້ໄພ ຊາວໂຣຮິງຍາ ທີ່ອົບພະຍົບໜີຄວາມຮຸນແຮງມາຈາກມຽນມາ ໃຫ້ໄປອາໄສຢູ່ໃນເກາະອັນຫ່າງໄກ ກ່ອນທີ່ຈະສົ່ງຕົວກັບໄປມຽນມາ
ທາງລັດຖະບານຈະແຕ່ງຕັ້ງຄະນະກຳມະການພິເສດຂຶ້ນມາ ເພື່ອຈັດການກັບເລື່ອງນີ້ໂດຍສະເພາະ ເຊິ່ງເກາະດັ່ງກ່າວນີ້ມີຊື່ວ່າ Thengar Char ຕັ້ງຢູ່ໃກ້ກັບເກາະ Hatiya ໃນເຂດ Noakhali ທາງພາກເໜືອຂອງອ່າວເບງກອລ
ການເດີນທາງຈາກຄ້າຍພັກຂອງຊາວໂຣຮິງຍາ ໄປຫາເກາະດັ່ງກ່າວ ໃຊ້ເວລາປະມານ 9 ຊົ່ວໂມງ ເກາະນີ້ຕັ້ງຢູ່ພື້ນທີ່ຕໍ່າກວ່າລະດັບນໍ້າທະເລ ແລະຢູ່ຫ່າງຈາກເກາະ Hatiya ໄປທາງພາກຕາເວັນຕົກປະມານ 30 ກິໂລແມັດ ເຊິ່ງໃນອະດີດເກາະນີ້ ເຄີຍຖືກນໍ້າຖ້ວມຕະຫຼອດ ແຕ່ທາງລັດຖະບານໄດ້ແກ້ໄຂບັນຫາດ້ວຍການປູກຕົ້ນໄມ້ອ້ອມເພື່ອກັ້ນນໍ້າ
ບັນດາຊາວໂຣຮິງຍາທີ່ມີເອກະສານ ແລະບໍ່ມີເອກະສານປະຈຳຕົວປະມານ 232.000 ຄົນ ລ້ວນອາໄສ ຢູ່ໃນບັງກາລາເທດມາຫຼາຍປີ ກ່ອນທີ່ຈະມີຄວາມຂັດແຍ່ງໃນລັດຍະໄຂ່ ຈະເກີດຂຶ້ນ ໃນເດືອນຕະລາຜ່ານມາ ແລະນໍາພາຊາວໂຣຮິງຍາຫຼາຍກວ່າ 65,000 ຄົນ ອົບພະຍົບມາບັງກາລາເທດເພີ່ມຂຶ້ນອີກ