ພິທີເປີດການນຳໃຊ້ເຂື່ອນໄຟຟ້ານ້ຳຕົກ ນ້ຳແບງ ເມືອງ ປາກແບງ ແຂງ ອຸດົມໄຊ ໄດ້ຈັດຂຶ້ນຢ່າງເປັນທາງການໃນຕອນເຊົ້າຂອງວັນທີ 13 ມັງກອນ 2017 ທີ່ຜ່ານມາ ພາຍໃຕ້ການເປັນປະທານຂອງທ່ານ ດຣ. ສີນາວາ ສຸພານຸວົງ ສະມາຊິກສະພາແຫ່ງຊາດ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ເປັນກຽດເຂົ້າຮ່ວມໂດຍມີບັນດາການນຳຂັ້ນສູງກາງ, ຂັ້ນແຂວງ, ຂັ້ນເມືອງ ແລະ ຝ່າຍບໍລິສັດຮັບເໝົາກໍ່ສ້າງ ຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີ ທ່ານ ເຈີງເຊິງຈິນ ຮອງປະທານບໍລິສັດ ໄຟຟ້ານ້ຳຕົກນ້ຳແບງ ຈຳກັດ ໄດ້ໃຫ້ກຽດລາຍງານສະພາບການຈັດຕັ້ງປະຕິບັດໂຄງການ ໂດຍໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້ານ້ຳຕົກນ້ຳແບງ ເປັນໂຄງການຮ່ວມມືໂຄງການທີ 2 ທີ່ຮ່ວມມືກັບລັດຖະບານລາວ ພະລັງງານຕິດຕັ້ງຂອງໂຄງການແມ່ນ 36 ເມັກກາວັດ ແລະ ໃຊ້ອຸໂມງສົ່ງນ້ຳ, ສິ່ງກໍ່ສ້າງສຳຄັນຂອງໂຄງການມີ: ເຂື່ອນ, ໂຮງຈັກໄຟຟ້າ, ເຂື່ອນມີຄວາມສູງ 25.5 ແມັດ, ອຸໂມງສົ່ງນ້ຳຍາວ 4.5 ກິໂລແມັດ, ສາມາດຜະລິດກະແສໄຟຟ້າໄດ້ 141 ຈິກະວັດຕໍ່ປີ, ເລີ່ມແຕ່ເດືອນ ມິຖຸນາ 2006 ໄດ້ເຊັນສັນຍາຂໍ້ຕົກລົງຮ່ວມກັນ ຈົນເຖິງເດືອນ ທັນວາ 2016 ໄດ້ສຳເລັດການກໍ່ສ້າງ ໃຊ້ເວລາທັງໝົດ 10 ປີ ແລະ ໃຊ້ທຶນການກໍ່ສ້າງທັງໝົດກວ່າ 72 ລ້ານໂດລາສະຫະລັດ.
ຈາກນັ້ນ ທ່ານປະທານ ກໍ່ໄດ້ໃຫ້ກຽດກ່າວຄຳຄິດເຫັນ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ຂອງໂຄງການ ແລະ ຫວັງວ່າຈະເປັນສ່ວນໜຶ່ງໃນການປະກອບສ່ວນພັດທະນາດ້ານເສດຖະກິດຂອງຊາດໃນອະນາຄົດ ພ້ອມທັງລັ່ນຄ້ອງເປີດພິທີຢ່າງເປັນທາງການ.
ໂດຍນັກຂ່າວ: ບຸນນາກ ຄໍາເພັງ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!