ສຳນັກຂ່າວຕ່າງປະເທດລາຍງານເມື່ອວັນທີ 31 ມັງກອນ 2017 ນີ້ວ່າ ຄະນະກຳມະການກອງທຶນລະຫວ່າງປະເທດ ສະໜັບສະໜູນໃຫ້ເພີ່ມພາສີທົ່ວອ່າວອາຫຼັບ ເພື່ອຫຼຸດການຂາດດູນງົບປະມານ ເຊິ່ງທີ່ຢູ່ອາໄສປອດພາສີ ຈະໄດ້ມີການເກັບພາສີ, ຫຼັງຈາກສະພາອະນຸມັດຂຶ້ນພາສີ ຕາມການສະໜັບສະໜູນ ຂອງກອງທຶນການເງິນລະຫວ່າງປະເທດ ຫຼືໄອເອັມເອຟ ທີ່ເປັນຜົນມາຈາກລາຄານໍ້າມັນຫຼຸດລົງ, ສຳລັບການເກັບພາສີສິນຄ້າ 5% ຈະຖືກເອົາມາໃຊ້ແນ່ນອນ ຫຼັງ 6 ປະເທດອາຫຼັບ ຕົກລົງຮ່ວມມືກັນ ໃນເດືອນມິຖຸນາປີຜ່ານມາ
ສຳລັບຜູ້ທີ່ອາໄສຢູ່ໃນອ່າວອາຫຼັບ ແຕ່ກ່ອນນັ້ນບໍ່ໄດ້ເສຍພາສີ, ຈົນມາຮອດເກີດວິກິດການ ລາຄານໍ້າມັນຕົກຕໍ່າ ທີ່ເກີດຂຶ້ນໃນກາງປີ 2014 ເຮັດໃຫ້ມີການຊອກຫາຊ່ອງທາງລາຍໄດ້ເຂົ້າລັດ ດ້ວຍການຂຶ້ນພາສີທີ່ຢູ່ອາໄສໃນຄັ້ງນີ້
ສະພາຊາອຸດິອາຣະເບຍ ໄດ້ພິຈາລະນາ ອະນຸມັດຂໍ້ຕົກລົງເພີ່ມພາສີ ເປັນຄວາມສຳເລັດຂອງສະພາ ຄວາມຮ່ວມມືອ່າວອາຫຼັບ ຫຼື GCC ແລະກົດໝາຍນີ້ ໄດ້ກຽມທຸກຢ່າງໄວ້ພ້ອມແລ້ວ, ນອກຈາກນີ້ ສະພາຄວາມຮ່ວມມືອ່າວອາຫຼັບ ຍັງພ້ອມຕົກລົງເລືອກຂຶ້ນພາສີຢາສູບ ແລະເຄື່ອງດື່ມເພີ່ມກຳລັງ ໃນປີນີ້ນຳອີກ