ກອງປະຊຸມປຶກສາຫາລືກ່ຽວກັບບັນດາຂະບວນການຕ່າງໆ ເພື່ອສະເໜີເຂດປ່າສະຫງວນແຫ່ງຊາດ ຫີນໜາມໜໍ່ ເມືອງບົວລະພາ ແຂວງຄຳມ່ວນ ຂຶ້ນເປັນມໍລະດົກໂລກທາງດ້ານທຳມະຊາດ ຈັດຂຶ້ນວັນທີ 26 ມັງກອນ 2017 ທີ່ໂຮງແຮມວຽງຈັນພາຊາ ເປັນປະທານຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໃຫ້ກຽດເຂົ້າຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ຄຳສີ ອຸທິວົງ ຮອງເຈົ້າແຂວງຄຳມ່ວນ ຜູ້ຕາງໜ້າຈາກອົງການ GIZ ອົງການ UNESCO ແລະ ພາກສ່ວນກ່ຽວຂ້ອງ.
ກອງປະຊຸມດັ່ງກ່າວ ໄດ້ຮັບຟັງການລາຍງານຈາກຊ່ຽວຊານອາວຸໂສຂອງອົງການສາກົນ ເພື່ອອະນຸຮັກທຳມະຊາດ (IUCN) ກ່ຽວກັບຜົນການສຶກສາຂັ້ນເບື້ອງຕົ້ນ ກ່ຽວກັບຂະບວນການຈັດຕັ້ງປະຕິບັດທີ່ກ່ຽວຂ້ອງ ໃນການສະເໜີເຂດປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກຂອງອົງການ UNESCO ເຊິ່ງຊ່ຽວຊານດັ່ງກ່າວ ໄດ້ແນະນຳເຖິງຂະບວນການທີ່ກ່ຽວຂ້ອງ ໃນການສະເໜີເຂດປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກໂລກ ລວມທັງຂອບເຂດໄລຍະການດຳເນີນງານ ແລະ ມາດຕະຖານເພື່ອພິຈາລະນາຄຸນຄ່າອັນໂດດເດັ່ນທີ່ເປັນສາກົນ (OUV) ພ້ອມທັງອະທິບາຍເຖິງຄວາມກະຈ່າງແຈ້ງເຖິງອົງປະກອບ ຫຼື ທາງເລືອກຕ່າງໆທີ່ເໝາະສຳລັບການສະເໜີເຂດປ່າສະຫງວນດັ່ງກ່າວ ເຂົ້າເປັນມໍລະດົກໂລກ ເພື່ອໃຫ້ຜູ້ເຂົ້າຮ່ວມໄດ້ປຶກສາຫາລືແລກປ່ຽນບັນດາຄຳຄິດຄຳເຫັນ ດ້ານຈຸດດີ ແລະ ຂໍ້ຄົງຄ້າງ ເພື່ອພ້ອມກັນແກ້ໄຂໃນການຈັດຕັ້ງປະຕິບັດວຽກງານ ໃນການເອົາປ່າສະຫງວນຫີນໜາມໜໍ່ ເຂົ້າເປັນມໍລະດົກໂລກທາງຊັບພະຍາກອນທຳມະຊາດແຫ່ງທຳອິດຂອງ ສປປ ລາວ ໃນມໍ່ໆນີ້ ນອກນັ້ນຍັງໄດ້ປຶກສາວຽກງານບຸລິມະສິດ ທີ່ຈະຕ້ອງສຳເລັດໃນການຈັດຕັ້ງປະຕິບັດ ແລະ ຊ່ອງຫວ່າງຂອງການສະເໜີເຂດປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກຂອງອົງການ UNESCO ຕື່ມອີກ.
ຂ່າວ: ໜັງສືພິມ ວຽງຈັນໃໝ່