ສປປ ລາວ ແລະ ຣາຊະອານາຈັກກໍາປູເຈຍ ໄດ້ປຶກສາຫາລື ແລະ ເຫັນດີເປັນເອກະພາບເບື້ອງຕົ້ນ ເພື່ອກໍານົດຈຸດກໍ່ສ້າງຂົວເຊື່ອມຕໍ່ ລະຫວ່າງສອງປະເທດ, ຂົງເຂດ ແລະພາກພື້ນ ຂະນະທີ່ ແຜນກໍ່ສ້າງ ຂົວຂ້າມເຊລໍາເພົາແຫ່ງນີ້ ໂດຍປະຕິບັດຕາມການຕົກລົງ ເຫັນດີຂອງສອງ ນາຍົກລັດຖະມົນຕີລາວ ແລະ ກຳປູເຈຍ ຄັ້ງວັນທີ 23 ພະຈິກ 2016 ທີ່ ຊຽມຣຽບ, ຣາຊະອານາຈັກ ກໍາປູເຈຍ, ຕໍ່ມາໃນວັນທີ 27 ມັງກອນ 2017, ຄະນະປະຕິບັດງານຮ່ວມ ລາວ-ກໍາປູເຈຍ, ກໍາປູເຈຍ-ລາວ ເຊິ່ງຝ່າຍລາວນຳໂດຍ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີ ກະຊວງການຕ່າງປະເທດ ພອ້ມຄະນະ ປະຕິບັດງານຮ່ວມ, ຝ່າຍກຳປູເຈຍນໍາໂດຍ ທ່ານ ລອງວິຊະໂລ, ຮອງລັດຖະມົນຕີ ກະຊວງການຕ່າງປະເທດ ແລະ ຮ່ວມມືສາກົນ, ໂດຍມີທ່ານຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ບັນດາການນໍາຂອງແຂວງ, ຜູ້ຕາງໜ້າຈາກບັນດາກະຊວງ ແລະ ຂະແໜງການ ທີ່ກ່ຽວຂ້ອງຂອງລາວ ແລະ ກຳປູເຈຍ ໄດ້ຮ່ວມກັນ ສຳຫລວດພູມີປະເທດຕົວຈິງ ແລະ ປຶກສາຫາລືກັນກ່ຽວກັບ ຈຸດທີ່ຈະກໍ່ສ້າງຂົວ ຂ້າມເຊລຳເພົາ ແລະ ໄດ້ເຫັນດີເປັນເອກະພາບກັນ ກໍານົດຈຸດທີ່ຈະສ້າງຂົວດັ່ງກ່າວ ຢູ່ລະຫວ່າງ ບໍລິເວນບ້ານເວີນຍາງ, ເມືອງມຸນລະປະໂມກ, ແຂວງຈໍາປາສັກ (ລາວ) ແລະ ຕາແສງທ່າເປືອຍ, ແຂວງເພຣຍວິເຮຍ (ກໍາປູເຈຍ) ມີໄລຍະຫ່າງຈາກປາກເຊລໍາເພົາ ປະມານ 1.500 ແມັດ.
ການລົງສຳຫລວດຢູ່ພື້ນທີ່ຕົວຈິງ ໃນຄັ້ງນີ້ເປັນການປະຕິບັດ ຕາມເຈດຕະນາລົມ ແລະຄວາມມຸ້ງມາດປາດຖະໜາ ຂອງລັດຖະບານສອງປະເທດລາວ ແລະກຳປູເຈຍ ທີ່ຢາກຈະຂະຫຍາຍຕາໜ່າງ ການເຊື່ອມໂຍງ ເພື່ອເອື້ອອຳນວຍຄວາມສະດວກ ໃຫ້ແກ່ການໄປມາຫາສູ່ກັນ, ສົ່ງເສີມການແລກປ່ຽນການຄ້າ, ການທ່ອງທ່ຽວ ລະຫວ່າງ ສອງປະເທດ.
ອີງໃສ່ຜົນການ ສຳຫລວດພື້ນທີ່ຕົວຈິງ, ສອງຝ່າຍໄດ້ປຶກສາຫາລື ແລະ ແລກປ່ຽນຄວາມເຫັນ ນໍາກັນຢ່າງກົງໄປກົງມາ ເພື່ອເຮັດໃຫ້ຂົວດັ່ງກ່າວ ໄດ້ຮັບການກໍ່ສ້າງໂດຍໄວ ແລະ ຮັບປະກັນ ທາງດ້ານສິດຜົນປະໂຫຍດ ຂອງທັງສອງຝ່າຍ, ພ້ອມທັງຈະນໍາເອົາຜົນ ຂອງການສໍາຫລວດ ພື້ນທີ່ຕົວຈິງຄັ້ງນີ້ ລາຍງານຂັ້ນເທິງຂອງຕົນ ໃຫ້ການຊີ້ນໍາ ແລະ ສືບຕໍ່ດຳເນີນໄປ ດ້ວຍບັນຍາກາດ ແຫ່ງໄມຕີຈິດ, ມິດຕະພາບທີ່ດີນຳກັນ ແລະ ໄດ້ລົງນາມບົດບັນທຶກຮ່ວມກັນ ເພື່ອເປັນບ່ອນອີງ ໃນການຈັດຕັ້ງປະຕິບັດ ໃນຕໍ່ໜ້າ.
ຂ່າວ: ສຳນັກຂ່າວສານປະເທດລາວ