ເຄື່ອງດື່ມຫຼຸດນໍ້າໜັກ ເປັນອີກທາງເລືອກໜຶ່ງສຳລັບຄົນຮັກສຸຂະພາບ ທີ່ນອກຈາກອອກກຳລັງກາຍ ເຊິ່ງເປັນສ່ວນສຳຄັນໃນການເຜົາຜານໄຂມັນສ່ວນເກີນ ແລະຫຼຸດໜ້າທ້ອງແລ້ວ, ເຄື່ອງດື່ມ ເພື່ອສຸຂະພາບກໍເປັນອີກທາງເລືອກໜຶ່ງ ທີ່ຊ່ວຍໃຫ້ເຈົ້າມີໜ້າທ້ອງບາງ, ຫຼຸດຄວາມຕຸ້ຍໄດ້ຢ່າງປອດໄພ ເຊິ່ງມື້ນີ້ລາວໂພສຕ໌ ມີເຄື່ອງດື່ມ 5 ຊະນິດທີ່ຊ່ວຍໃຫ້ເຈົ້າມີສຸຂະພາບດີມາຝາກກັນ
- ນໍ້າຊາຂຽວ: ຊາຂຽວສາມາດຊ່ວຍຫຼຸດຄວາມຕຸ້ຍ ແລະຄວບຄຸມໄຂມັນ, ນອກນັ້ນ ຍັງມີສານຕ້ານອະນຸມູນອິດສະລະ ຊ່ວຍຫຼຸດໄຂມັນບໍລິເວນໜ້າທ້ອງໄດ້ ພຽງແຕ່ຈິບຊາຂຽວກ່ອນອອກກຳລັງກາຍ ກໍຈະຊ່ວຍເພີ່ມອັດຕາການເຜົາຜານໄຂມັນໄດ້
- ນໍ້າເຕົາຫູ້: ມີສານແລັກຕິນ ຊ່ວຍປ້ອງກັນການສະສົມຂອງເຊວໃນຮ່າງກາຍ ພ້ອມຊ່ວຍລະລາຍໄຂມັນສ່ວນເກີນ ພຽງແຕ່ດື່ມນໍ້າເຕົາຫູ້ 3 ເທື່ອຕໍ່ອາທິດ ກໍຊ່ວຍເພີ່ມອັດຕາການເຜົາຜານໄຂມັນສ່ວນເກີນໄດ້
- ກາເຟດຳ: ກາເຟດຳມີສ່ວນປະສົມຂອງຄາເຟອິນ ມີປະໂຫຍດຊ່ວຍໃຫ້ຫົວໃຈສູບເລືອດໄດ້ດີ, ມີການວິໄຈພົບວ່າຄາເຟອິນ ສາມາດຊ່ວຍເຜົາຜານແຄລໍລີ່ໄດ້, ດັ່ງນັ້ນ ຫາກດື່ມກາເຟດຳ 1 ຈອກກ່ອນອອກກຳລັງກາຍ ຈະມີສ່ວນຊ່ວຍຫຼຸດໄຂມັນໃນຮ່າງກາຍ ແລະອາດຊ່ວຍຫຼຸດອາການເຈັບປວດຈາກການອອກກຳລັງກາຍໄດ້ອີກດ້ວຍ
- ນໍ້າໝາກແຕງໂມ: ມີສານອາຫານຫຼາຍຊະນິດ ລວມເຖິງໄລໂຄປີນ ທີ່ຊ່ວຍຕ້ານມະເຮັງ ແລະມີກົດອະມິໂນທີ່ມີຊື່ວ່າອາຈິນີນ ເຊິ່ງມີການສຶກສາພິມອອກວາລະສານ Nutritionບອກວ່າ ນໍ້າໝາກແຕງໂມ ຊ່ວຍສ້າງກ້າມເນື້ອໄດ້ ແຕ່ຕ້ອງອອກກຳລັງກາຍຄູ່ກັນໄປ
- ນໍ້າໝາກນັດ: ໝາກນັດມີສານ “ໂບຣມີເລນ” ທີ່ຊ່ວຍຍ່ອຍໂປຣຕີນ ເຮັດໃຫ້ຍ່ອຍອາຫານງ່າຍຂຶ້ນ, ລວມທັງຊ່ວຍຫຼຸດອາການທ້ອງອືດ, ມີການວິໄຈພົບວ່າ ການກິນນໍ້າໝາກນັດ ໃນປະລິມານທີ່ເໝາະສົມ ຈະຊ່ວຍຫຼຸດລະດັບຄໍເລດເຕີຣໍ ໃນເລືອດໄດ້, ນອກນັ້ນ ໄຂມັນໂມເລກຸນດ່ຽວ ທີ່ບໍ່ອິ່ມຕົວ ຍັງມີສ່ວນປ້ອງກັນການເກີດພະຍາດຫົວໃຈໄດ້
ການດື່ມເຄື່ອງດື່ມຫຼຸດນໍ້າໜັກ ເພື່ອສຸຂະພາບຊະນິດໃດກໍຕາມ ຄວນດື່ມໃຫ້ພຽງພໍກັບຄວາມຕ້ອງການຂອງຮ່າງກາຍ ເພາະຫາກດື່ມຫຼາຍເກີນໄປ ອາດເກີດການສະສົມໃນຮ່າງກາຍ ຫຼືໜ້້ອຍເກີນໄປກໍເຮັດໃຫ້ຂາດສານອາຫານ ແລະຄວນຫາເວລາຫວ່າງອອກກຳລັງກາຍຄູ່ກັນໄປ ພ້ອມກັບການກິນວິຕາມິນ ແລະສານອາຫານຕ່າງໆ ໃນປະລິມານທີ່ພຽງພໍກັບຄວາມຕ້ອງການຂອງຮ່າງກາຍ ເພື່ອສຸຂະພາບທີ່ດີທັງພາຍໃນ ແລະພາຍນອກຂອງຕົວເຈົ້າເອງ
ຕິດຕາມນານາສາລະ ກົດໄລຄ໌ເລີຍ!