ອີງຕາມການລາຍງານຂອງກະຊວງແຮງງານຂອງຍີ່ປຸ່ນ ເມື່ອວັນທີ 28 ມັງກອນ 2017 ຜ່ານມາ ເຜີຍວ່າ ຈຳນວນແຮງງານຕ່າງປະເທດໃນຍີ່ປຸ່ນໃນຮອບ 1 ປີຜ່ານມາ ນັບແຕ່ເດືອນ ຕຸລາ 2016 ເພີ່ມຂຶ້ນ 1 ລ້ານກວ່າຄົນເປັນຄັ້ງທຳອິດ ເພີ່ມຂຶ້ນເກືອບ 20% ເມື່ອທຽບຊ່ວງດຽວກັນໃນປີຜ່ານມາ, ເຊິ່ງສ່ວນຫຼາຍເປັນຄົນຈີນ ແລະຫວຽດນາມ ໂດຍສະເພາະໃນສ່ວນການກໍ່ສ້າງທີ່ຂາດແຮງງານຢ່າງແຮງ ທ່າມກາງຕະຫຼາດແຮງງານຢູ່ໃນຊ່ວງສັງຄົມຜູ້ອາຍຸສູງຫຼາຍ
ສຳລັບແຮງງານໃນພາກສ່ວນການກໍ່ສ້າງ ປັບຕົວຂຶ້ນຈາກ 2.9 ໝື່ນຄົນ ໃນປີ 2015, ເປັນ 4.1 ໝື່ນຄົນໃນປີ 2016 ເຊິ່ງຄວາມຕ້ອງການແຮງງານເພີ່ມຂຶ້ນມາຈາກການສ້າງສິ່ງປຸກສ້າງ ເພື່ອການແຂ່ງຂັນກິລາໂອລິມປິກລະດູຮ້ອນປີ 2020 ແລະຟື້ນຟູສິ່ງປຸກສ້າງທີ່ເປ່ເພຈາກແຜ່ນດິນໄຫວ ແລະສຶນາມິປີ 2011
ສຳລັບຄົນຕ່າງປະເທດສ່ວນຫຼາຍທີ່ເຂົ້າໄປເຮັດວຽກຢູ່ຍີ່ປຸ່ນແມ່ນ ຄົນຈີນ 30% ຂອງຈຳນວນແຮງງານຕ່າງປະເທດທັງໝົດ ແລະຄົນຈີນ ຍັງເຂົ້າມາເຮັດວຽກໃນຍີ່ປຸ່ນເພີ່ມຂຶ້ນ 6.9% ເມື່ອທຽບກັບຊ່ວງດຽວກັນໃນປີຜ່ານມາ, ຫວຽດນາມມີ 16% ແຕ່ຈຳນວນແຮງງານຄົນຫວຽດນາມເພີ່ມຂຶ້ນຮອດ 50% ເມື່ອທຽບກັບປີກ່ອນ