ສຳນັກຂ່າວສານປະເທດລາວ (ຂປລ) ລາຍງານວ່່: ໃນໂອກາດທີ່ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວໄດ້ພົບປະ ແລະ ໂອ້ລົມຕໍ່ກອງປະຊຸມສະຫລຸບວຽກງານ ປ້ອງກັນຄວາມສະຫງົບປະຈໍາປີ 2016 ແລະ ວາງທິດທາງແຜນການປີ 2017 ໃນວັນທີ 27 ມັງກອນ 2017 ນີ້ ຢູ່ກະຊວງປ້ອງກັນຄວາມສະຫງົບ ທ່ານ ໄດ້ເນັ້ນໃຫ້ ຄະນະພັກ, ຄະນະນໍາ ແລະ ພະນັກງານຫລັກແຫລ່ງ ຂອງກະຊວງປ້ອງກັນຄວາມສະຫງົບ ເອົາໃຈໃສ່ເພີ່ມທະວີຄວາມໂປ່ງໃສ ແລະ ແກ້ໄຂຄະດີຕ່າງໆ ດ້ວຍຄວາມເປັນທໍາພ້ອມທັງສຶກສາຄົ້ນຄ້ວາບັນດາສະພາບການທີ່ຜັນແປຂອງພາກພື້ນ ແລະ ໂລກຢ່າງທ່ວງທັນ, ຊັດເຈນ ແລະ ເລິກເຊິ່ງ ເພື່ອແກ້ໄຂໃຫ້ທັນເຫດການ.
ທ່ານ ທອງລຸນ ສີສຸລິດ ຍັງເນັ້ນໃຫ້ກໍາລັງ ປກສ ຕ້ອງເອົາໃຈໃສ່ແກ້ໄຂຄວາມບໍ່ສະຫງົບ ທີ່ເກີດຂຶ້ນຢູ່ບາງແຂວງໃຫ້ໝົດໄປ ແລະ ເປັນລະບຽບຮຽບຮ້ອຍ, ມີຂໍ້ມູນໃຫ້ການນໍາເປັນປົກກະຕິ ລວມທັງຕິດຕາມການເຄື່ອນໄຫວ ຂອງພວກກຸ່ມຄົນບໍ່ຫວັງດີ ຢູ່ພາຍໃນຢ່າງທັນການ, ຕ້ອງຮູ້ຂົນຂວາຍປະຊາຊົນ ໃຫ້ມີຄວາມເຂົ້າໃຈຕໍ່ແນວທາງນະໂຍບາຍ, ລະບຽບກົດໝາຍຂອງພັກ-ລັດໃຫ້ເຂົ້າໃຈຢ່າງແຈ່ມແຈ້ງ ເພື່ອໃຫ້ເຂົາເຈົ້າເປັນຫູເປັນຕາ ໃຫ້ເຈົ້າໜ້າທີ່, ຕ້ອງຕິດຕາມ ແລະ ກວດກາບັນດາລົດທີ່ນໍາເຂົ້າ ແບບບໍ່ຖືກກົດໝາຍຢ່າງເຂັ້ມງວດ, ກໍາລັງປ້ອງກັນຄວາມສະຫງົບ ຕ້ອງສືບຕໍ່ເຂັ້ມແຂງ, ມີວິໄນ, ເປັນກໍາລັງທີ່ມີໄຫວພິບ ທີ່ຫລັກແຫລມ, ຮູ້ທັນເຫດການ ແລະ ແກ້ໄຂບັນຫາທີ່ເກີດຂຶ້ນໃຫ້ທັນເວລາ ພ້ອມນີ້ ກໍາລັງປ້ອງກັນຄວາມສະຫງົບ ຕ້ອງເປັນທີ່ເພີ່ງຂອງປະຊາຊົນໃຫ້ສົມກັບປະຊາຊົນ ໄວ້ເນື້ອເຊື່ອໃຈເໝືອນປາກັບນ້ຳ, ຕ້ອງຕິດຕາມ, ກວດກາການລັກລອບຄ້າຂາຍຢາເສບຕິດ ແລະ ອາດຊະຍາກໍາຂ້າມຊາດຢູ່ພາຍໃນ ແລະ ຕ່າງປະເທດຢ່າງເຂັ້ມງວດ ບັນດາກົມກອງຕ້ອງເອົາໃຈໃສ່ ຈັດຕັ້ງປະຕິບັດນະໂຍບາຍປະຢັດ ແລະ ຕ້ານການຟຸມເຟືອຍຢ່າງເຄັ່ງຄັດ ແລະ ເຂັ້ມງວດຕາມນະໂຍບາຍລັດຖະບານວາງອອກ, ເອົາໃຈໃສ່ຄົ້ນຄົ້ວ, ວິເຄາະຂໍ້ມູນຂ່າວສານ ຢ່າງລວມສູນສາມາດຊ່ວຍໃຫ້ຄະນະພັກ, ຄະນະບັນຊາແຕ່ລະຂັ້ນ ຕົກລົງບັນຫາໄດ້ຢ່າງຊັດເຈນ, ວ່ອງໄວ ແລະ ທັນເວລາ, ເອົາໃຈໃສ່ຄຸ້ມຄອງພົນລະເມືອງໃຫ້ເຄື່ອນໄຫວ ຖືກຕາມກົດລະບຽບ ແລະ ກົດໝາຍ, ສືບຕໍ່ເອົາໃຈໃສ່ປ້ອງກັນຄວາມສະຫງົບ ໃນທົ່ວສັງຄົມ.
ແຫລ່ງຂ່າວຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!