ກອງປະຊຸມສະໄໝສາມັນຂອງລັດຖະບານ ຊຸດທີ VIII ປະຈໍາເດືອນມັງກອນ 2017 ທີ່ໄຂຂຶ້ນໃນວັນທີ 24-25 ມັງກອນ 2017 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີກອງປະຊຸມໄດ້ເຫັນບັນຫາສະພາບພົ້ນເດັ່ນທາງດ້ານທີ່ດິນ ກອງປະຊຸມໄດ້ເປັນເອກະພາບກັນໃນເບື້ອງຕົ້ນກ່ຽວກັບທິດທາງແກ້ໄຂດັ່ງນີ້:
ໃຫ້ແຕ່ງຕັ້ງຄະນະສະເພາະກິດໜຶ່ງຂຶ້ນເພື່ອສຶກສາ ແລະ ວິເຄາະ, ວິໄຈ ບັນຫາທີ່ດິນໃຫ້ເລິກເຊິ່ງ ມອບໃຫ້ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ເປັນຜູ້ຊີ້ນຳ, ມີລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເປັນຫົວໜ້າຄະນະນຳພາຢ່າງຕັ້ງໜ້າ ແລະ ມີງົບປະມານໃນການເຄື່ອນໄຫວປະຕິບັດໜ້າທີ່.
ຄະນະທີ່ຖືກແຕ່ງຕັ້ງ ຕ້ອງສຶກສາ, ວິເຄາະ, ວິໄຈລະອຽດບັນຫາທີ່ດິນເລິກເຊິ່ງ ພ້ອມທັງເບິ່ງບົດຮຽນຈາກປະເທດເພື່ອນມິດສາກົນ. ຄາດໝາຍໃນການເຮັດວຽກຂອງຄະນະໃຫ້ສຳເລັດ ແລະ ສາມາດລາຍງານລັດຖະບານ ຊ້າສຸດພາຍໃນເດືອນຕຸລາ 2017 ກ່ອນຈະນຳສະເໜີຕໍ່ກອງປະຊຸມກົມການເມືອງສູນກາງພັກ ແລະ ກອງປະຊຸມສະພາແຫ່ງຊາດເພື່ອພິຈາລະນາ.
ໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດສຶບຕໍ່ຕິດຕາມ, ກວດກາບັນຫາສະພາບການຄຸ້ມຄອງ, ນໍາໃຊ້, ການເຊົ່າ, ສໍາປະທານ ແລະ ການບຸກລຸກທີ່ດິນປ່າສະຫງວນ, ປ່າຕົ້ນນໍ້າ, ຊັບພະຍາກອນທຳມະຊາດ ທີ່ບໍ່ຖືກຕ້ອງໃນຂອບເຂດທົ່ວປະເທດຢ່າງເປັນປົກກະຕິ, ມີການລາຍງານໃຫ້ລັດຖະບານຊາບ ແລະ ສະເໜີທິດທາງແກ້ໄຂເປັນແຕ່ລະໄລຍະ.
ຂ່າວຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!