ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງສະຫວັນນະເຂດ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມນາຍ ແລະ ພົນທະຫານຢູ່ກອງ ກ 4 ໃນວັນທີ 26 ມັງກອນ 2017 ນີ້ ໂດຍມີບັນດາລັດຖະມົນຕີ, ຄະນະພັກ, ຄະນະບັນຊາ, ນາຍ ແລະ ພົນທະຫານ ໃຫ້ການຕ້ອນຮັບ.
ສະຫາຍ ພັນເອກ ຄໍາຍໍ ລິນສົມພູ ຮອງເລຂາຄະນະພັກ ຫົວໜ້າການທະຫານກອງ ກ 4 ໄດ້ລາຍງານ ສະພາບການຈັດຕັ້ງປະຕິບັດວຽກງານ ໃນໄລຍະທີ່ຜ່ານມາ ເປັນຕົ້ນ ໄດ້ເອົາໃຈໃສ່ສຶກສາອົບຮົມການ ເມືອງແນວ ຄິດໃຫ້ນາຍ ແລະ ພົນທະຫານໃຫ້ມີຄວາມເຂົ້າໃຈ ຕໍ່ແນວທາງນະໂຍບາຍຂອງພັກ-ລັດ ໃນແຕ່ລະໄລຍະ ໃຫ້ມີແນວຄິດຫລັກໝັ້ນຊົນຊັ້ນ, ມີຄວາມບໍລິສຸດສັດຊື່ ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ ແລະ ຕໍ່ປະຊາຊົນ ບັນດາເຜົ່າ, ມີສະຕິລະວັງຕົວ ຕໍ່ກົນອຸບາຍຫັນປ່ຽນຂອງສັດຕູ, ມີຄວາມເສຍສະຫລະອັນສູງສົ່ງເພື່ອຊາດ ເພື່ອປະຊາຊົນໂດຍຕິດພັນກັບການ ສ້າງຂະບວນການຕ່າງໆເຊັ່ນ: ຂະບວນການສ້າງກອງແຂງ ຮູ້ນຳພາຮອບດ້ານ, ຂະບວນການເຄື່ອນໄຫວ ຮັກສາຄວາມສະຫງົບປອດໄພ, ຂະບວນການກໍ່ສ້າງຮາກຖານການເມືອງ, ຂະບວນການປະຕິບັດ 7 ລະບອບ 18 ວຽກ.
ໃນໂອກາດນີ້, ທ່ານ ບຸນຍັງ ວໍລະຈິດ ກໍໄດ້ສະແດງຄວາມ ຍ້ອງຍໍຊົມເຊີຍຕໍ່ຜົນສຳເລັດຂອງການຊີ້ນຳໆພາຂອງກອງ ກ 4 ເຊິ່ງເຫັນວ່າ ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ຮັບການປະຕິບັດ ໄດ້ດີ ສະແດງອອກເຖິງສະເຖຍລະພາບ ທາງດ້ານການເມືອງ ມີຄວາມສະຫງົບ, ສັງຄົມມີຄວາມສີວິໄລ ປະຊາຊົນມີຊີວິດການເປັນຢູ່ດີຂຶ້ນ, ຍ້ອນຄວາມບຸກບືນ ຂອງບັນດາສະຫາຍ ໃນການແກ້ໄຂບັນຫາຢາເສບຕິດ, ກຸ່ມແກ້ງ, ປະກົດການຫຍໍ້ທໍ້ຕ່າງ ໆ ແມ່ນເຮັດໄດ້ດີ ໂດຍຕິດພັນກັບວຽກງານເພີ່ມພູນຜະລິດຜົນ ບັນດາກົມກອງສາມາດກຸ້ມຕົນເອງ, ເພິ່ງຕົນເອງສ້າງຄວາມເຂັ້ມແຂງ ດ້ວຍຕົນເອງຕິດພັນປະຊາຊົນ ຕິດພັນກັບການລົງກໍ່ສ້າງ ຮາກຖານ ການເມືອງ ສ້າງຄວາມເຊື່ອໝັ້ນ ແລະ ໄວ້ວາງໃຈໃຫ້ກັບປະຊາຊົນ.
ຂ່າວ: ສຳນັກຂ່າວສານປະເທດລາວ