ສຳນັກຂ່າວຕ່າງປະເທດລາຍງານເມື່ອວັນທີ 25 ມັງກອນ 2017 ນີ້ວ່າເມືອງເຊ່ຍເໝິນ ເມືອງທາງພາກຕາເວັນອອກສ່ຽງໃຕ້ຂອງຈີນ ໄດ້ເປີດຕົວເລນລົດຖີບລອຍຟ້າ ທີ່ມີຄວາມຍາວທີ່ສຸດໃນໂລກ ເປົ້າໝາຍເພື່ອຫຼຸດບັນຫາລົດຕິດຂອງເມືອງ ແລະຍັງເປັນການສະໝັບສະໜູນລະບົບຂົນສົ່ງສີຂຽວ ແບບຮັກໂລກອີກດ້ວຍ
ເລນລົດຖີບລອຍຟ້ານີ້ ມີຄວາມກວ້າງ 4.8 ແມັດ ປະກອບດ້ວຍເລນແລ່ນ 4 ເລນ ເຊິ່ງຖືວ່າເປັນເລນລົດຖີບລອຍຟ້າທີ່ມີຄວາມຍາວທີ່ສຸດໃນໂລກ ດ້ວຍໄລຍະທາງເຖິງ 7.6 ກິໂລແມັດ ເຊິ່ງຕໍ່ກັບສະຖານີປະຈຳທາງ ຂອງເມືອງເຖິງ 11 ສະຖານີ
ປົກກະຕິແລ້ວ ຄົນເມືອງເຊ່ຍເໝິນບໍ່ນິຍົມມັກການຂີ່ລົດຖີບປານໃດ ທາງການຈຶ່ງໄດ້ໃຊ້ລົດຖີບ 355 ຄັນເພື່ອໃຫ້ເຊົ່າ ສໍາລັບຜູ້ທີ່ສົນໃຈ, ນອກນັ້ນຍັງມີບ່ອນຈອດລົດຖີບກວ່າ 253 ຄັນ ສໍາລັບລົດຖີບບຸກຄົນທົ່ວໄປ ໃນ 7 ສະຖານີນຳອີກ, ນອກຈາກນັ້ນຍັງມີລະບົບຈອດແບບທັນສະໄໝ ດ້ວຍໃຊ້ສະມາດກຣາດໃນການປົດລ໊ອກລົດຖີບທີ່ຈອດຢູ່