ສະຖານະການອີຣັກເຄັ່ງຕຶງຂຶ້ນ ຫຼັງກຸ່ມກະບົດປະກາດທຳລາຍລ້າງຊົນເຜົ່າກຸ່ມນ້ອຍເຍຊິດິສ ໂອບາມາລັ່ນ ໂຈມຕີທາງອາກາດທັນທີ ຖ້າຫາກມີໄພຄຸກຄາມຕໍ່ພົນລະເມືອງສະຫະລັດອາເມລິກາ.
ສຳນັກຂ່າວບລູມເບີກດັອດຄອມ ເປີດເຜີຍວ່າ ປະທານາທິບໍດີບາຣັກ ໂອບາມາຂອງສະຫະລັດ ໃຫ້ອຳນາດກອງທັບອາກາດສະຫະລັດ ໂຈມຕີທາງອາກາດໃນອີຣັກທັນທີ ຖ້າຫາກເກີດໄພຄຸກຄາມຕໍ່ພົນລະເມືອງສະຫະລັດ.
ໃນຂະນະດຽວກັນ ສະຫະລັດ ກໍພ້ອມໃຫ້ຄວາມຊ່ວຍເຫຼືອພົນລະເມືອງອີຣັກໂດຍການສົ່ງອາຫານ ແລະນ້ຳທາງອາກາດ ໃນພື້ນທີ່ທີ່ອາດຈະສ່ຽງຕໍ່ການສູ້ຮົບທີ່ໃກ້ເມືອງຊິນຍາ ຕິດກັບຊາຍແດນຊີຣີ.
ເຊິ່ງການຊ່ວຍເຫຼືອດັ່ງກ່າວຖືກສົ່ງໄປຍັງຊົນເຜົ່າກຸ່ມນ້ອຍ ຊາວເຍຊິດິສ ເຊິ່ງກຸ່ມຕິດອາວຸດຫົວຮຸນແຮງໄດ້ປະກາດທີ່ຈະທຳລາຍຊາວເຍຊິດິສ ເຊິ່ງຖືເປັນການປະກາດຂ້າລ້າງເຜົ່າພັນ.