ໃນຕອນເຊົ້າຂອງວັນທີ 23 ມັງກອນ 2017 ຜ່ານມາ ທີ່ສຳນັກງານນາຍົກລັດຖະມົນຕີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມອຳລາຂອງ ທ່ານ ກວນ ຮວາ ປິງ ເອກອັກຄະລັດຖະທູດແຫ່ງ ສປ ຈີນ ປະຈໍາລາວ ເນື່ອງໃນໂອກາດສຳເລັດໜ້າທີ່ການທູດຢູ່ລາວ.
ໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ຕີລາຄາສູງຕໍ່ຜົນງານຂອງ ທ່ານ ກວນ ຮວາ ປິງ ທີ່ໄດ້ປະກອບສ່ວນຢ່າງຕັ້ງໜ້າ ເຂົ້າໃນການເສີມຂະຫຍາຍສາຍພົວພັນການຮ່ວມມື ຂອງສອງປະເທດ ລາວ-ຈີນ ທີ່ນັບມື້ນັບກ້າວເຂົ້າສູ່ລວງເລິກ ເວົ້າລວມ, ເວົ້າສະເພາະ ກໍ່ແມ່ນການຊຸກຍູ້ໃຫ້ແກ່ການແລກປ່ຽນຄະນະຜູ້ແທນຂັ້ນສູງ ແລະ ຄະນະການນຳທັງໃນສູນກາງ ແລະ ທ້ອງຖິ່ນ ໄດ້ໄປມາຫາສູ່ກັນ ຢ່າງເປັນປະຈຳ, ພ້ອມກັນຊຸກຍູ້ໃຫ້ແກ່ການຈັດຕັ້ງປະຕິບັດໂຄງການຮ່ວມມື-ຊ່ວຍເຫຼືອຕ່າງໆ ໃຫ້ໄດ້ຮັບຜົນດີ ແລະ ດຳເນີນໄປ ຕາມທີ່ການນຳຂັ້ນສູງສອງຝ່າຍໄດ້ຕົກລົງກັນ ລວມເຖິງການຊ່ວຍເຫຼືອລາວ ໃນການກະກຽມງານສຳຄັນອື່ນໆຂອງຊາດ ເປັນຕົ້ນ ການສະເຫຼີມສະຫຼອງ 40 ປີ ສະຖາປະນາ ສປປ ລາວ, ການກະກຽມການເປັນເຈົ້າພາບກອງປະຊຸມສຸດຍອດອາຊຽນ, ໂຄງການກໍ່ສ້າງທາງລົດໄຟ ລາວ-ຈີນ ແລະ ໂຄງການຊ່ວຍເຫຼືອກໍ່ສ້າງພື້ນຖານໂຄງລ່າງອື່ນຂອງລາວ ອັນເປັນການປະກອບສ່ວນຢ່າງຫຼວງຫຼາຍ ເຂົ້າໃນການພັດທະນາເສດຖະກິດ-ສັງຄົມຂອງລາວ.
ແຫຼ່ງຂ່າວ: ກົມປະຊາສຳພັນ