ໃນວັນທີ 24 ມັງກອນ 2017 ຜ່ານມານີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ໄດ້ລົງເຄື່ອນໄຫວຢ້ຽມຢາມ ແລະພົບປະບັນດາການນໍາ, ພະນັກງານຫລັກແຫລ່ງ ແລະ ປະຊາຊົນແຂວງຄໍາມ່ວນ ໂດຍໃຫ້ການຕ້ອນຮັບຂອງ ສະຫາຍ ໂອໄດ ສຸດາພອນ ເລຂາພັກແຂວງ, ເຈົ້າແຂວງຄໍາມ່ວນ.
ພ້ອມນີ້ ທ່ານ ເຈົ້າແຂວງຄຳມ່ວນ ກໍໄດ້ລາຍງານຕໍ່ ປະທານປະເທດ ຮັບຊາບວ່າ: ສະພາບການພັດທະນາເສດຖະກິດ-ສັງຄົມ, ການເຊື່ອມຊຶມ ແລະ ຈັດຕັ້ງຜັນຂະຫຍາຍມະຕິ X ຂອງພັກ, ລວມທັງການພັດທະນາຮອບດ້ານຂອງແຂວງ ໃນໄລຍະ 1 ປີຜ່ານມາ ເຊິ່ງໄດ້ກຳນົດ 10 ຍຸດທະສາດ, 32 ແຜນງານ, 127 ໂຄງການ ແລະ 1.173 ແຜນງານຍ່ອຍ ໃນນັ້ນ ຈັງຫວະການຂະຫຍາຍຕົວ ທາງດ້ານເສດຖະກິດ ໃນສົກປີຜ່ານມາ ຢູ່ໃນລະດັບເກືອບ 8%, ສະເລ່ຍລາຍຮັບເກືອບ 2.000 ໂດລາສະຫະລັດ/ຄົນ/ປີ, ການລົງທຶນຂອງລັດ ມີທັງໝົດ 355 ໂຄງການ ມູນຄ່າ 142 ຕື້ກວ່າກີບ ສຳລັບການອະນຸມັດລົງທຶນພາຍໃນມີ 111 ໂຄງການ ມູນຄ່າ 3 ຕື້ກວ່າກີບ ແລະ ການລົງທຶນຂອງຕ່າງປະເທດມີ 9 ໂຄງການ ມູນຄ່າ 1 ຕື້ກວ່າກີບ ເຊິ່ງສ່ວນໃຫຍ່ກວມຂົງເຂດການຄ້າ, ການບໍລິການ, ບໍ່ແຮ່ ແລະ ການລົງທຶນ ໃນເຂດເສດຖະກິດພິເສດ.
ໃນໂອກາດດັ່ງກ່າວນີ້ ປະທານປະເທດ ກໍໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດທີ່ຄະນະນໍາ ແຂວງຄຳມ່ວນຍາດມາໄດ້ ແລະ ເຮັດໃຫ້ມີໃບໜ້າໃໝ່ ຫລາຍດ້ານ, ແນວໃດກໍດີ ກໍຍັງມີສິ່ງທ້າທາຍຫລາຍບັນຫາ ທີ່ຈະຕ້ອງໄດ້ແກ້ໄຂຮີບດ່ວນຄື: ບັນຫາການປ່ຽນແປງຂອງສິນຄ້າ ບ່ອນຈຳຫນ່າຍ, ການປູກ, ການລ້ຽງສັດເປັນສິນຄ້າ ພ້ອມຕິດຕາມຕະຫລາດ ໃຫ້ເຫມາະສົມ. ພ້ອມນັ້ນ ຍັງໄດ້ເນັ້ນໃຫ້ບັນດາການນໍາ ແລະ ພະນັກງານຫລັກແຫລ່ງເອົາໃຈໃສ່ແກ້ໄຂບາງຂໍ້ຄົງຄ້າງ, ເພີ່ມທະວີພັດທະນາ ແລະ ຍົກລະດັບຊີວິດການເປັນຢູ່ຂອງປະຊາຊົນ ໃຫ້ນັບມື້ດີຂຶ້ນເທື່ອລະກ້າວ ແລະ ສາມາດຫລຸດພົ້ນອອກຈາກຄວາມທຸກຍາກ ໃນຕໍ່ໜ້າໂດຍໄວ; ກວດກາ ແລະ ເລັ່ງແກ້ໄຂບາງປະກົດການຫຍໍ້ທໍ້ ໂດຍສະເພາະການສໍ້ລາດບັງຫລວງ, ຄຸ້ມຄອງຊັບສິນຂອງລັດ, ການຕິດຕາມການຜັນແປຂອງຕະ ຫລາດ, ການປະຕິບັດວິໄນ ແຜນການ-ການເງິນ ແລະ ອື່ນໆໃຫ້ປະກົດຜົນເປັນຈິງ ເພື່ອຮັບປະກັນຄວາມສະຫງົບ ທາງດ້ານການເມືອງ ແລະ ສ້າງຄວາມຢູ່ດີກິນດີ ປະຊາຊົນລາວບັນດາເຜົ່າ ມີຄວາມຜາສຸກ.
ຂ່າວ: ສຳນັກຂ່າວສານປະເທດລາວ