ວຽກງານການ ເຊື່ອມໂຍງເສດຖະກິດ ແມ່ນວຽກບູລິມະສິດໜຶ່ງ ສໍາຄັນທີ່ສຸດຂອງ ລັດຖະບານລາວ ໂດຍສະເພາະ ວຽກງານການເຊື່ອມໂຍງ ເສດຖະກິດອາຊຽນ ແມ່ນປັດໃຈສຳຄັນຮີບດ່ວນ ໃນການຊຸກຍູ້ແຜນພັດທະນາ ເສດຖະກິດ-ສັງຄົມ, ການສ້າງໂອກາດ ດ້ານການຂະຫຍາຍ ຕະຫລາດຕ່າງປະເທດ ໃຫ້ແກ່ສິນຄ້າສົ່ງອອກຂອງລາວ, ສາມາດເພີ່ມທະວີ ການດຶງດູດການລົງທຶນ ຈາກຕ່າງປະເທດ ໂດຍສະເພາະແມ່ນ ການພົວພັນຮ່ວມມືທຸລະກິດ ລາວ-ຝຣັ່ງ ເຊິ່ງໃນປີທີ່ຜ່ານມາ ພົບວ່າຕົວເລກການລົງທຶນ ຂອງນັກລົງທຶນຝຣັ່ງ ທີ່ເຂົ້າມາລົງທຶນໃນ ສປປ ລາວ ແມ່ນມີມູນຄ່າຫລາຍກ່ວາ 490 ລ້ານໂດລາສະຫະລັດ ຈັດຢູ່ໃນອັນດັບທີ 6 ຂອງປະເທດ ທີ່ເຂົ້າມາລົງທຶນໃນ ສປປ ລາວ.
ງານພົບປະນັກທຸລະກິດລາວ-ຝຣັ່ງ ຄັ້ງທີ 2 ພາຍໃຕ້ຫົວຂໍ້ “ເປີດປະຕູສູ່ອາຊຽນ” ໄດ້ຈັດຂຶ້ນໃນວັນທີ 24 ມັງກອນ 2017 ທີ່ນະຄອນຫລວງວຽງຈັນ ໂດຍໃຫ້ກຽດເຂົ້າຮ່ວມ ຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເຊິ່ງທ່ານໄດ້ກ່າວບາງຕອນ ໃນງານພົບປະ ນັກທຸລະກິດ ລາວ-ຝຣັ່ງ ຄັ້ງນີ້ວ່າ: ຕ້ອງໄດ້ສຸມທຸກເຫື່ອແຮງ ເຂົ້າໃນການບັນລຸຜົນສຳເລັດ ໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ 8 ເຊິ່ງເປົ້າໝາຍຫລັກແມ່ນ ສູ້ຊົນນຳເອົາປະເທດຊາດ ໃຫ້ຫລຸດພົ້ນອອກຈາກ ສະຖານະພາບດ້ອຍພັດທະນາ ໃນປີ 2020, ຫວັງຢ່າງຍິ່ງວ່າ ໃນການບັນລຸເປົ້າໝາຍດັ່ງກ່າວ ສປປ ລາວ ຈະໄດ້ຮັບການ ສະໜັບສະໜູນ ແລະ ຊ່ວຍເຫລືອ ຈາກບັນດາປະເທດເພື່ອນມິດ ເປັນຕົ້ນແມ່ນປະເທດຝຣັ່ງ ແລະ ບັນດາປະເທດ ທີ່ນຳໃຊ້ພາສາຝຣັ່ງ ເຊິ່ງການຊ່ວຍເຫລືອ ການພັດທະນາຂອງລັດຖະບານຝຣັ່ງ ຕໍ່ລັດຖະບານ ສປປ ລາວ ມີ 2 ຮູບແບບຄື: ການຊ່ວຍເຫລືອ ໂດຍຜ່ານອົງການຝຣັ່ງ ເພື່ອການພັດທະນາ ແລະ ການຊ່ວຍເຫລືອ ຜ່ານທາງສະຖານທູດຝຣັ່ງ ປະຈຳ ສປປ ລາວ. ນອກຈາກນັ້ນຍັງມີການຊ່ວຍເຫລືອ ຈາກອົງການຈັດຕັ້ງອື່ນໆຂອງຝຣັ່ງ ປັດຈຸບັນ ໂຄງການທີ່ຜ່ານອົງການຝຣັ່ງ ເພື່ອການພັດທະນາ ທີ່ກຳລັງຈັດຕັ້ງປະຕິບັດ ມີຢູ່ 5 ໂຄງການ ແລະ ຜ່ານສະຖານທູດປະຈຳລາວ ກຳລັງ ຈັດຕັ້ງປະຕິບັດມີຢູ່ 23 ໂຄງການ ລວມມູນຄ່າສະເລ່ຍ 15 ລ້ານເອີໂຣຕໍ່ປີ ແລະ ການຊ່ວຍເຫລືອຜ່ານຂອບການຮ່ວມມື ຫລາຍຝ່າຍມູນຄ່າ 25 ລ້ານເອີໂຣ.
ພ້ອມນີ້ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ນາງ ໂກລດິນ ເລີດູ ເອກອັກຄະລັດຖະທູດຝຣັ່ງ ປະຈຳ ສປປ ລາວ ພ້ອມດ້ວຍນັກທຸລະກິດ ລາວ-ຝຣັ່ງ ແລະ ພາກສ່ວນກ່ຽວຂ້ອງ ກໍໄດ້ປຶກສາຫາລືແລກປ່ຽນ ຄວາມຄິດຄວາມຫັນ ແລະ ຊອກຫາຊ່ອງທາງ ເພື່ອແນ່ໃສ່ສົ່ງເສີມ ການຂະຫຍາຍການຮ່ວມມື ດ້ານການຄ້າ ແລະ ການລົງທຶນ ໃຫ້ນັບມື້ຂະຫຍາຍຕົວຂຶ້ນ, ພ້ອມທັງເປັນການຜັກດັນ ແລະ ຊຸກຍູ້ສົ່ງເສີມ ໃຫ້ພາກທຸລະກິດຂອງຝຣັ່ງ ໄດ້ມີໂອກາດພົບປະ ຊອກຫາຊ່ອງທາງ ການດຳເນີນທຸລະກິດຢູ່ ສປປ ລາວ ຕາມແຕ່ລະຂົງເຂດ.
ຂ່າວ: ສຳນັກຂ່າວສານປະເທດລາວ