ໂຄງການເມືອງດອກຈຳປາ ເປັນໂຄງການທີ່ຕິດພັນກັບໂຄງການສ້າງເສັ້ນທາງດ່ວນຄູ່ຂະໜານຖະໜົນ ໄກສອນ ພົມວິຫານ ໃນນີ້ ໂຄງການເມືອງດອກຈຳປາ ຈະສ້າງສິ່ງອຳນວຍຄວາມສະດວກຫຼາຍຢ່າງ ໃນການພັດທະນາອ່າງໂຕ່ງນ້ຳ ບ່ອນພັກນ້ຳ ສ້າງເຂດສີຂຽວ ພື້ນທີ່ດັ່ງກ່າວ ຈະສາມາດຮອງຮັບປະຊາຊົນທີ່ຖືກຜົນກະທົບຈາກໂຄງການສ້າງທາງດ່ວນ ເປັນການທ້ອນໂຮມຕອນດິນຂອງລັດຄຸ້ມຄອງທີ່ຖືກບຸກຄົນ ນິຕິບຸກຄົນບຸກລຸກທີ່ນອນໃນເຂດສະຫງວນ ຄອງລະບາຍນ້ຳມາກ່ອນ ໃຫ້ເກັບຄືນມາເປັນຂອງລັດ ຫຼຸດຜ່ອນການໃຊ້ທຶນຂອງລັດໃນການສ້າງບ່ອນພັກນ້ຳ ອ່າງໂຕ່ງນ້ຳ ແລະຄອງລະບາຍນ້ຳ ເພື່ອຮອງຮັບການລະບາຍນ້ຳ ອ່າງໂຕ່ງນ້ຳ-ແກ້ມລີງ ເພື່ອປ້ອງກັນຄວາມສ່ຽງຈາກນ້ຳຖ້ວນ ສ້າງອ່າງບຳບັດນ້ຳເປື້ອນທີ່ທັນສະໄໝແຫ່ງທຳອິດໃນນະຄອນຫຼວງວຽງຈັນ.
ໄລຍະຜ່ານມາ ລັດຖະບານໄດ້ອະນຸມັດໃຫ້ບໍລິສັດ ເອເຊຍລົງທຶນ ແລະ ບໍລິການ ຈຳກັດ ຮ່ວມກັບນະຄອນຫຼວງວຽງຈັນ ສ້າງຕັ້ງບໍລິສັດປະສົມຮ່ວມກັນ ເພື່ອເປັນກົນໄກໃນການພັດທະນາໂຄງການດັ່ງກ່າວ ຕາມແຈ້ງການຂອງຫ້ອງວ່າການລັດຖະບານ ໃນປີ 2013 ແລະ ມາຮອດປີ 2014 ລັດຖະບານໄດ້ແຈ້ງການໃຫ້ໂຈະຊົ່ວຄາວ ເພື່ອຢັ່ງຫາງສຽງຂອງປະຊາຊົນ ວ່າມີຜົນໄດ້ຜົນເສຍຫຼາຍໜ້ອຍສ່ຳໃດ ໃນເບື້ອງຕົ້ນເນື້ອທີ່ໂຄງການເມືອງດອກຈຳປາ 270 ເຮັກຕາ ເພື່ອຫຼີກລ່ຽງບໍ່ໃຫ້ປະຊາຊົນມີຜົນກະທົບຈາກໂຄງການດັ່ງກ່າວຫຼາຍ ແລະ ສອດຄ່ອງກັບນິຕິກຳທີ່ກຳນົດເຂດສະຫງວນອ່າງໂຕ່ງ ອົງການປົກຄອງນະຄອນຫຼວງວຽງຈັນ ຈຶ່ງໄດ້ດັດປັບແຜນພັດທະນາ ແລະ ດັດແປງເນື້ອທີ່ໃຫ້ເຫຼືອພຽງແຕ່ 142,88 ເຮັກຕາ.
ປັດຈຸບັນ ພື້ນທີ່ກ່ອນການພັດທະນາມີເນື້ອທີ່ດິນຂອງປະຊາຊົນ 100,24 ເຮັກຕາ ຄອງນ້ຳ 6,42 ເຮັກຕາ ເນື້ອທີ່ເສັ້ນທາງ 36,22 ເຮັກຕາ ພື້ນທີ່ແຜນພັດທະນາ ແລະ ກິດຈະກຳຕົ້ນຕໍຂອງໂຄງການ ຫຼັງການພັດທະນາເສັ້ນທາງດ່ວນ 35,92 ເຮັກຕາ ເສັ້ນທາງເຊື່ອມຕໍ່ 1 ເຮັກຕາ ຄອງລະບາຍນ້ຳ 7 ເຮັກຕາ ອ່າງໂຕ່ງ+ແກ້ມລີງ 25 ເຮັກຕາ ພື້ນທີ່ສີຂຽວ 12 ເຮັກຕາ ພື້ນທີ່ເອົາໄວ້ຮອງຮັບການຍົກຍ້າຍປະຊາຊົນ 5 ເຮັກຕາ ເນື້ອທີ່ພັດທະນາເປັນເຂດເສດຖະກິດ 56,96 ເຮັກຕາ ເມື່ອໂຄງການນີ້ໄດ້ຮັບການຈັດຕັ້ງປະຕິບັດ ລັດຈະຫຼຸດຜ່ອນຄ່າໃຊ້ຈ່າຍໃນການສ້າງທາງດ່ວນ 2,5 ກິໂລແມັດ ເພາະວ່າບໍລິສັດຈະເປັນຜູ້ລົງທຶນໃຫ້ 100%.
ຂ່າວ: ໜັງສືພິມ ວຽງຈັນໃໝ່