ສາວໆໜຸ່ມໆຫຼາຍຄົນ ຕ້ອງມີບັນຫາກ່ຽວກັບຜົມຫຼົ່ນ ແລະມີຄວາມກັງວົນໃຈທຸກຄັ້ງ ທີ່ສະຜົມ ຫຼືຫວີຜົມ ແລ້ວເຫັນຜົມຫຼົ່ນຈົນເປັນກອງ ຈົນເຮັດໃຫ້ຕອນນີ້ຜົມບາງ ເຊິ່ງຜົມກໍບຳລຸງດີທຸກຢ່າງ ແຕ່ກໍຍັງມີບັນຫາ ມື້ນີ້ລາວໂພສຕ໌ ຈະມາບອກໃຫ້ຮູ້ກ່ຽວກັບພຶດຕິກຳທີ່ເຮັດໃຫ້ຜົມຫຼົ່ນມາຝາກກັນ

1. ສະຜົມຕະຫຼອດ: ໜຸ່ມສາວທີ່ມີບັນຫາກ່ຽວກັບໜັງຫົວມັນ ຫຼືຄົນທີ່ມັກອອກກຳລັງກາຍທຸກວັນ ເຮັດໃຫ້ຕ້ອງໄດ້ສະຜົມທຸກວັນ ເຊິ່ງການສະຜົມຕະຫຼອດອາດເຮັດໃຫ້ໜັງຫົວແຫ້ງ ຈົນເກີດອາການຄັນ ແລະເປັນລັງແຄ ສຸດທ້າຍກໍຜົມຫຼົ່ນໄດ້
2. ຫວີຜົມແຮງ, ຫວີຕະຫຼອດ ແລະຫວີໃນເວລາຜົມປຽກ: ສາວໆທີ່ຜົມຍາວ ກໍຈະຮັກຜົມຕົນເອງ ຈົນຕ້ອງໄດ້ຫວີຜົມທຸກໆຊົ່ວໂມງ ຫຼືຫວີຜົມໃນເວລາທີ່ຜົມປຽກ, ເຈົ້າອາດຈະກຳລັງທຳລາຍຜົມແບບບໍ່ຮູ້ຕົວ ເພາະການຫວີຜົມນອກຈາກຈະເຮັດໃຫ້ເສັ້ນຜົມຫຼົ່ນຫຼາຍຂຶ້ນແລ້ວ ຫວີຍັງສຽດສີກັບເສັ້ນຜົມຫຼາຍເກີນໄປ ຈົນເຮັດໃຫ້ຜົມແຫ້ງເສຍໄດ້
3. ໃຊ້ໄດຮ້ອນເປົ່າຜົມຕະຫຼອດ: ຄວາມຮ້ອນຈາກໄດເປົ່າຜົມ ນອກຈາກຈະເຮັດໃຫ້ຜົມເສຍໄດ້ງ່າຍແລ້ວສ ຍັງເຮັດໃຫ້ໜັງຫົວແຫ້ງ, ຄັນ ແລະຂາດ ແລະເສັ້ນຜົມຫຼົ່ນໄດ້ງ່າຍ
4. ດັດ, ຍ້ອມ ແລະເຮັດສີຜົມຫຼາຍເກີນໄປ: ໜຸ່ມສາວທີ່ມັກປ່ຽນສີຜົມຕະຫຼອດອາດປະສົບບັນຫາເສັ້ນຜົມຫຍາບ, ບໍ່ນຸ້ມ, ຜົມແຕກປາຍ, ແຫ້ງ ບຳລຸງເທົ່າໃດກໍຍາກທີ່ຈະກັບມາງາມຄືເກົ່າ ແລະຍັງເປັນສາເຫດທີ່ເຮັດໃຫ້ຜົມຫຼົ່ນໄດ້ງ່າຍ
5. ກິນອາຫານລົດຊາດເຜັດ: ອາຫານທີ່ເຮົາກິນຈະສົ່ງຜົນກັບຜົມຫຼົ່ນໄດ້, ອາຫານລົດຊາດເຜັດ ຫຼືເຄັມຫຼາຍເກີນໄປ ຈະເຮັດໃຫ້ຄວາມດັນສູງຂຶ້ນ ເສັ້ນເລືອດຫົດຕົວ ເປັນຜົນເຮັດໃຫ້ເລືອດໄປລ້ຽງຮາກຜົມໄດ້ໜ້ອຍ ແລະເຮັດໃຫ້ຜົມບໍ່ແຂງແຮງ ແລະຫຼົ່ນໄດ້ງ່າຍ
6. ດື່ມແອວກໍຮໍ ແລະສູບຢາ: ການດືືມແອວກໍຮໍ ແລະສູບຢາ ຈະສົ່ງຜົນກັບລະບົບໄຫຼວຽນຂອງເລືອດ, ເສັ້ນເລືອດຈະຢູ່ໃນພາວະຫົດຕົວ ແລະແຂງຕົວ ເຮັດໃຫ້ເລືອດໄຫຼວຽນບໍ່ສະດວກ ເມື່ອອະໄວຍະວະຕ່າງໆ ບໍ່ໄດ້ຮັບເລືອດ ຈະເຮັດໃຫ້ເຊວຕ່າງໆໃນຮ່າງກາຍເຮັດວຽກຜິດປົກກະຕິ ແລະເຊວຜິວໜັງ, ຮູຂຸມຂົນບໍ່ແຂງແຮງ ເຮັດໃຫ້ຜົມຫຼົ່ນໄດ້ງ່າຍ

ຜົມຫຼົ່ນເປັນບັນຫາທີ່ໃຜຫຼາຍໆຄົນອຸກໃຈ ແຕ່ຖ້າຫາກກິນອາຫານທີ່ມີປະໂຫຍດ ໂດຍສະເພາະໄຂມັນດີເຊັ່ນ ປາທະເລນໍ້າເລິກ, ນໍ້າມັນໝາກກອກ, ໂປຣຕີນຕ່າງໆ, ຜັກສີຂຽວ ແລະທັນຍາພືດຕ່າງໆ, ອອກກຳລັງກາຍສະໝໍ່າສະເໝີ ແລະພັກຜ່ອນໃຫ້ພຽງພໍ ບໍ່ດັດ, ຢືດ, ຍ້ອມຕະຫຼອດ ເທົ່ານີ້ເສັ້ນຜົມກໍຈະແຂງແຮງ ບໍ່ຫຼົ່ນໄດ້ງ່າຍ
ຕິດຕາມນານາສາລະ ກົດໄລຄ໌ເລີຍ!