ພາຍຸທໍນາໂດ ຖະຫຼົ່ມພາກໃຕ້ຂອງສະຫະລັດ ເສຍຊີວິດແລ້ວ​ 18 ຄົນ

0
1568

ສຳນັກຂ່າວຕ່າງປະເທດລາຍງານເມື່ອວັນທີ 23 ມັງກອນ 2017 ຜ່ານມາວ່າ ພາຍຸທໍນາໂດ ໄດ້ພັດຖະຫຼົ່ມທາງພາກຕາເວັນອອກສ່ຽງໃຕ້ຂອງສະຫະລັດ ເສຍຊີວິດແລ້ວ 18 ຄົນ ເຊິ່ງມີຊາວເມືອງໃນລັດຈໍເຈຍ 14 ຄົນ ແລະລັດມິສຊິສຊິບປີ 4 ຄົນ ແລະບາດເຈັບອີກ 20 ຄົນ ເຊິ່ງກະແສລົມຮຸນແຮງສ້າງຄວາມເສຍຫາຍໃຫ້ກັບເຮືອນປະຊາຊົນ ແລະ ພັດຕົ້ນໄມ້, ເສົາໄຟຟ້າລົ້ມຫຼາຍຕົ້ນ, ຖະໜົນຫຼາຍສາຍຖືກຕັດຂາດ

ທ່ານ ນາທານ ດີນ ຜູ້ວ່າການລັດຈໍຣ໌ເຈຍ ປະກາດພາວະສຸກເສີນໃນ 7 ເຂດບໍລິເວນພາກກາງຕອນໃຕ້ຂອງລັດ ທີ່ໄດ້ຮັບຄວາມເສຍຫາຍຢ່າງຮ້າຍແຮງ ຈາກສະພາບອາກາດທີ່ປັ່ນປ່ວນ ແລະກໍ່ໃຫ້ເກີດພາຍຸທໍນາໂດຖະຫຼົ່ມ

ສຳນັກງານອຸຕຸນິຍົມວິທະຍາແຫ່ງຊາດສະຫະລັດ ອອກມາປະກາດເຕືອນໄພຄວາມສ່ຽງສູງ ບໍລິເວນພາກໃຕ້ຂອງລັດຈໍຣ໌ເຈຍ ພາກເໜືອ ແລະພາກກາງຂອງລັດຟໍລິດ້າ ແລະທັງໝົດຂອງລັດແອລະບາມາ ເຊິ່ງຖືວ່າເປັນການເຕືອນໄພລະວັງທໍນາໂດຄັ້ງຮຸນແຮງ ນັບຕັ້ງແຕ່ປີ 2014