ຂປລ. ລັດຖະບານປະກອບ ແລະ ຄຸ້ມຄອງລົດປະຈໍາຕໍາແໜ່ງ ພະນັກງານການນໍາ ລະດັບສູງຄືນໃໝ່ ເພື່ອຜັນຂະຫຍາຍ ການຈັດຕັ້ງປະຕິບັດ ການປະຢັດ ແລະ ຕ້ານການຟຸ່ມເຟືອຍ ຂອງລັດຖະບານ ໃຫ້ມີປະສິດທິຜົນຕົວຈິງ ແລະ ຍຶນຍົງ ດັ່ງນັ້ນ ລັດຖະບານ ຈຶ່ງໄດ້ອອກດໍາລັດ ເລກທີ 15/ນຍ ລົງວັນທີ 5 ມັງກອນ 2017 ວ່າດ້ວຍການປະກອບ ແລະ ຄຸ້ມຄອງລົດປະຈໍາຕໍາແໜ່ງ ພະນັກງານການນໍາລະດັບສູງ ເພື່ອເປັນບ່ອນອີງ ໃນການຈັດຕັ້ງປະຕິບັດ ວຽກງານດັ່ງກ່າວ ໃຫ້ແກ່ອົງການຈັດຕັ້ງ ພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ຂັ້ນສູນກາງໃຫ້ມີ ຄວາມເປັນເອກະພາບ ແລະ ລວມສູນ, ອໍານວຍຄວາມສະດວກ ແລະ ສ້າງເງື່ອນໄຂ ໃຫ້ພະນັກງານການນໍາລະດັບສູງ ໃຫ້ເຮັດສໍາເລັດໜ້າທີ່ວຽກງານ ພັກ-ລັດ ແລະ ປະຊາຊົນມອບໝາຍໃຫ້ ແນໃສ່ປະຕິບັດນະໂຍບາຍ ປະຢັດແຫ່ງຊາດ ໃຫ້ສອດຄ່ອງກັບ ສະພາບຄວາມເປັນຈິງ ທາງດ້ານເສດຖະກິດ-ສັງຄົມ ຂອງປະເທດເຮົາ.
ທ່ານ ຈະເລີນ ເຢຍປາວເຮີ ລັດຖະມົນຕີປະຈໍາ ສໍານັກງານນາຍົກ ລັດຖະມົນຕີ, ໂຄສົກລັດຖະບານ ໄດ້ຖະແຫລງຂ່າວ ຕໍ່ສື່ມວນຊົນ ໃນວັນທີ 23 ມັງກອນ 2017 ນີ້ ທີ່ນະຄອນຫລວງວຽງຈັນວ່າ: ດໍາລັດສະບັບເລກທີ 15/ນຍ ລົງວັນທີ 5 ມັງກອນ 2017 ປະກອບມີ IV ໝວດ ແລະ ຄຸ້ມຄອງລົດປະຈໍາຕໍາແໜ່ງ ພະນັກງານການນໍາລະດັບສູງ ນັບແຕ່ປະເພດ I ຮອດປະເພດ IV ປະກອບມີ ຕໍາແໜ່ງປົກຄອງປະເພດ I ແມ່ນໃຫ້ປະກອບລົດ ປະຈໍາຕໍາແໜ່ງ 3 ຄັນ: ຄື: ປະເພດລົດເກັງ 1 ຄັນ ຄວາມແຮງບໍ່ເກີນ 3.500 ຊີຊີ, ລົດສໍາຮອງປະເພດລົດຈິບ 1 ຄັນ, ຄວາມແຮງບໍ່ເກີນ 4.500 ຊີຊີ, ລົດກະບະ 4 ປະຕູ 1 ຄັນ, ຄວາມແຮງບໍ່ເກີນ 3.500 ຊີຊີ, ປະກອບນ້ຳມັນ 500 ລິດ/ເດືອນ; ການນໍາລະດັບສູງປະເພດ II ໃຫ້ປະກອບລົດປະຈໍາຕໍາແໜ່ງ 2 ຄັນຄື: ປະເພດລົດເກັງ 1 ຄັນ, ຄວາມແຮງບໍ່ເກີນ 3000 ຊີຊີ, ປະເພດລົດຈິບ 1 ຄັນ, ປະກອບນໍ້າມັນທັງໝົດ 350 ລິດ/ເດືອນ; ການນໍາລະດັບສູງປະເພດ III ໃຫ້ປະກອບລົດ ປະຈໍາຕໍາແໜ່ງ ຈໍານວນ 2 ຄັນ, ລົດເກັງ 1 ຄັນ, ຄວາມແຮງບໍ່ເກີນ 2.500 ຊີຊີ, ລົດກະບະ 1 ຄັນ ຄວາມແຮງບໍ່ເກີນ 2.500 ຊີຊີ, ປະກອບນ້ຳມັນທັງໝົດ 300 ລິດ/ເດືອນ; ການນໍາລະດັບສູງປະເພດ IV ໃຫ້ປະກອບລົດ ປະຈໍາຕໍາແໜ່ງຈໍານວນ 1 ຄັນ, ລົດເກັງ 1 ຄັນ ຄວາມແຮງບໍ່ເກີນ 2.000 ຊີຊີ, ປະກອບນໍ້າມັນ 200 ລິດ/ເດືອນ.
ທ່ານ ຈະເລີນ ເຢຍປາວເຮີ ຍັງກ່າວຕື່ມອີກວ່າ: ດໍາລັດດັ່ງກ່າວ ຍັງໄດ້ເຫັນດີໃຫ້ຖອນລົດຄືນ ລົດປະຈໍາຕໍາແໜ່ງ ຂອງພະນັກງານ ການນໍາຂັ້ນສູງ ແລະ ລົດຮັບແຂກຢູ່ຂັ້ນສູນກາງ, ນະຄອນຫລວງ ແລະ ບັນດາແຂວງ ທີ່ເປັນປະເພດລົດ BMW ແລະ ລົດປະເພດອື່ນໆ ທີ່ບໍ່ເໝາະສົມກັບ ຕໍາແໜ່ງການນໍາລະດັບສູງ, ການປະກາດດໍາລັດ ສະບັບເລກທີ 15/ນຍ ແມ່ນການຈັດຕັ້ງ ປະຕິບັດສິດ ແລະ ໜ້າທີ່ ຂອງນາຍົກລັດຖະມົນຕີ ທີ່ໄດ້ລະບຸໄວ້ ໃນກົດໝາຍວ່າດ້ວຍລັດຖະບານ ສະບັບປັບປຸງເລກທີ 69/ສພຊ ລົງວັນທີ 15 ທັນວາ 2015, ແມ່ນການຜັນຂະຫຍາຍ ກົດໝາຍວ່າດ້ວຍ ງົບປະມານແຫ່ງລັດ ສະບັບປັບປຸງເລກທີ 71/ສພຊ ລົງວັນທີ 16 ທັນວາ 2015 ແລະ ກົດໝາຍວ່າດ້ວຍ ພະນັກງານ-ລັດຖະກອນ ສະບັບເລກທີ 74/ສພຊ ລົງວັນທີ 18 ທັນວາ 2015 ພ້ອມກັນນີ້ ກໍແມ່ນການຈັດຕັ້ງ ປະຕິບັດມະຕິຕົກລົງ ຂອງກອງປະຊຸມ ລັດຖະບານເປີດກ້ວາງ ສະບັບເລກທີ 12/ລບ ລົງວັນທີ 20 ທັນວາ 2016 ການປະກາດໃຊ້ ດໍາລັດສະບັບດັ່ງກ່າວ ແມ່ນມີຄວາມໝາຍຄວາມສໍາຄັນ ກ່ຽວກັບການຈັດຕັ້ງ ປະຕິບັດນະໂຍບາຍ ປະຢັດ ແລະ ຕ້ານການຟຸມເຟືອຍ ຂອງພັກ-ລັດ ທີ່ໄດ້ຫັນດໍາລັດ ຂອງລັດຖະບານເຮົາ.
ຂ່າວ: ສຳນັກຂ່າວສານປະເທດລາວ