ສຳນັກຂ່າວຕ່າງປະເທດລາຍງານເມື່ອວັນທີ 23 ມັງກອນ 2017 ຜ່ານມາວ່າ ຊາອຸດິອາຣະເບຍ ຕັ້ງເປົ້າໝາຍໃໝ່ກຽມເປັນປະເທດສີຂຽວ ດ້ວຍເງິນລົງທຶນມູນຄ່າຫຼາຍໝື່ນລ້ານດອນລາສະຫະລັດ ເພື່ອສ້າງແຫຼ່ງພະລັງງານສະອາດໃນປະເທດ, ເນື່ອງຈາກປັດຈຸບັນຊາອຸດິອາຣະເບຍ ມີການໃຊ້ພະລັງງານສະອາດພຽງແຕ່ 1% ເທົ່ານັ້ນ ເພາະປະເທດນີ້ເພິ່ງພາພະລັງງານ ແລະເສດຖະກິດນໍ້າມັນເປັນຫຼັກ
Khalid Al-Falih ລັດຖະມົນຕີວ່າການກະຊວງພະລັງງານ ແລະບໍ່ແຮ່ເວົ້າວ່າ ຢູ່ນະຄອນຫຼວງຣິຍາດ ທາງລັດຖະບານຕັ້ງເປົ້າໝາຍວ່າຈະລົງທຶນງົບປະມານມູນຄ່າ 30-50 ພັນລ້ານດອນລາສະຫະລັດ ເພື່ອສ້າງລະບົບພະລັງງານສະອາດ ພາຍໃນປີ 2032 ນີ້
ນອກຈາກນັ້ນ ໃນລະຫວ່າງການປະຊຸມສຸດຍອດພະລັງງານໂລກທີ່ອາບູ ດາບີ ໃນອາທິດຜ່ານມາ Falih ບອກວ່າເຂົາຄາດຫວັງຈະພັດທະນາລະບົບພະລັງງານແສງອາທິດ ຢູ່ຊາອຸດິອາຣະເບຍໃຫ້ເຫຼືອເຟືອການໃຊ້, ຕິດຕັ້ງກັງຫັນຂະໜາດໃຫຍ່ ເພື່ອເກັບພະລັງງານລົມ, ນອກຈາກນັ້ນຍັງມີແຜນທີ່ຈະຕິດຕັ້ງໂຮງໄຟຟ້ານິວເຄຣຍອີກ 2 ໂຮງ ແລະຊອກຫາແຫຼ່ງພະລັງງານອື່ນໆອີກ