ກະຊວງປ້ອງກັນປະເທດ ຈັດງານສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 68 ປີ (20/1/1949-20/1/2017) ໃນວັນທີ 20 ມັງກອນ 2017 ຜ່ານມານີ້ທີ່ກະຊວງປ້ອງກັນປະເທດ ໃຫ້ກຽດເຂົ້າຮ່ວມມີທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ພ້ອມດ້ວຍບັນດາຄະນະພັກ-ຄະນະນຳກະຊວງ ກົມກອງອ້ອມຂ້າງ.
ທ່ານລັດຖະມົນຕີກະຊວງປ້ອງກັນປະເທດ ໄດ້ກ່າວວ່າ: ກ່ອນໜ້ານີ້ 68 ປີ ເພື່ອຕອບສະໜອງຄວາມຮຽກຮ້ອງຕ້ອງການ ຂອງພາລະກິດຕໍ່ສູ້ກູ້ເອົາປະເທດ ອອກຈາກການຮຸກຮານ ຢຶດຄອງຂອງພວກຈັກກະພັດ ແລະລູກແຫຼ່ງຕີນມືພວກຂາຍຊາດ ກອງລາດຊະວົງ ໄດ້ຖືກກໍ່ຕັ້ງຂຶ້ນຢູ່ທີ່ຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ ໂດຍແມ່ນປະທານ ໄກສອນ ພົມວິຫານ ຜູ້ນຳແສນເຄົາລົບຮັກ ເປັນຜູ້ຊີ້ນຳ-ນຳພາໂດຍກົງນັ້ນ ໄດ້ກາຍເປັນວັນແຫ່ງການເຕົ້າໂຮມ ບັນດາກອງກຳລັງປະກອບອາວຸດທີ່ໄດ້ສ້າງຕັ້ງຂຶ້ນ ຢູ່ໃນບໍລິເວນຕ່າງໆໃນທົ່ວປະເທດ ໃຫ້ເຂົ້າເປັນກອງທັບລາວອິດສະຫຼະ ມັນໄດ້ເປັນຂີດໃໝ່ທີ່ຢັ້ງຢືນ ເຖິງການເຕີບໃຫຍ່ຂະຫຍາຍຕົວຂອງກຳລັງປະກອບອາວຸດຂອງພວກເຮົາ ພາຍຫຼັງການຕໍ່ສູ້ກັບພວກສັດຕູທັງລະບອບເກົ່າ ແລະ ໃໝ່ເປັນເວລາດົນນານຂອງກອງທັບປະຊາຊົນລາວ ແລະ ປະຊາຊົນລາວບັນດາເຜົ່າ ມາຮອດວັນທີ 2 ທັນວາ 1975 ລາວເຮົາໄດ້ຮັບການສະຖາປະນາຢ່າງສະຫງ່າງາມ ພາຍຫຼັງການປົດປ່ອຍໂດຍກຳແໜ້ນ 2 ໜ້າທີ່ຍຸດທະສາດຂອງພັກກອງທັບປະຊາຊົນລາວ ໄດ້ເສີມຂະຫຍາຍທາດແທ້ ແລະ ມູນເຊື້ອຂອງຕົນ ອອກແຮງປັບປຸງກຳລັງປ້ອງກັນຊາດປ້ອງກັນຄວາມສະຫງົບຮອບດ້ານ ຍາມໃດກໍ່ເຊີດຊູສະຕິລະວັງຕົວເຝິກແອບຮ່ຳຮຽນ ກຽມພ້ອມສູ້ຮົບເປັນກຳລັງຫຼັກແຫຼ່ງສະກັດກັ້ນ ແລະທັບມ້າງທຸກກົນອຸບາຍຂອງພວກອິດທິກຳລັງປໍລະປັກທີ່ຫວັງມ້າງເພທຳລາຍທຸກຮູບແບບຢ່າງທັນການ ດ້ວຍນ້ຳໃຈພິລະອາດຫານເດັດຂາດມີໄຊ ປົກປັກຮັກສາເອກະລາດ ອຳນາດອະທິປະໄຕ ແລະຜືນແຜ່ນດິນອັນຄົບຖ້ວນໄວ້ໄດ້ຢ່າງໝັ້ນຄົງ.
ຄຽງຄູ່ກັນນັ້ນ ກອງທັບປະຊາຊົນລາວ ຍັງໄດ້ເອົາໃຈໃສ່ເສີມຂະຫຍາຍມູນເຊື້ອສ້າງສະຕິເພິ່ງຕົນເອງ ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ດ້ວຍການຄຸດຄົ້ນທ່າແຮງບົ່ມຊ້ອນຂອງກົມກອງທັງກຳລັງຫຼວງ ແລະທ້ອງຖິ່ນ ເຂົ້າໃນການປັບປຸງກໍ່ສ້າງພື້ນຖານໂຄງລ່າງ ສ້າງພາລາທິການກັບທີ່ຍູ້ແຮງການຜະລິດ ແລະຜະລິດເປັນສິນຄ້າສ້າງລາຍຮັບໃຫ້ກົມກອງ ຍົກສູງຄຸນະພາບຊີວິດການເປັນຢູ່ຂອງພະນັກງານອ້າຍ-ນ້ອງໃຫ້ນັບມື້ດີຂຶ້ນເປັນກ້າວໆ ນອກຈາກການເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະພາຍໃນແລ້ວ ກອງທັບປະຊາຊົນລາວ ຍັງເປັນເຈົ້າການຢ່າງຕັ້ງໜ້າເຂົ້າໃນການເສີມຂະຫຍາຍການຮ່ວມມືກັບພາກພື້ນ ແລະສາກົນ.
ຂ່າວ: ໜັງສືພິມ ວຽງຈັນໃໝ່