ສຳນັກຂ່າວຕ່າງປະເທດລາຍງານ ເມື່ອວັນທີ 11 ມັງກອນ 2017 ຜ່ານມາວ່າ ຜົວເມຍຄົນຈີນ ໄດ້ຂັງແມ່ ໄວ້ໃນຄອກເຫຼັກ ເຊິ່ງແມ່ອາຍຸ 92 ປີອາໄສຢູ່ເຂດຊົນນະບົດ ຊົນຊາດເຍົ້າ ເມືອງເຟິງສານ ເຂດປົກຄອງຕົນເອງກວ່າງຊີ ຖືກລູກຊາຍກັບໃພ້ ບັງຄັບໃຫ້ໃຊ້ຊີວິດຢ່າງໜ້າສົງສານ ພາຍໃນຫ້ອງເກົ່າມືດ, ແຄບ ແລະເປື້ອນ ບໍ່ມີຕຽງນອນ ມີພຽງຜ້າຫົ່ມຜືນເກົ່າ ທີ່ປູໄວ້ແຜ່ນໄມ້ກະດານເທົ່ານັ້ນ, ເຊິ່ງປະຕູເປັນເຫຼັກປິດລ໊ອກໄວ້ ເບິ່ງແລ້ວບໍ່ຕ່າງກັບຄອກໝູ, ນອກຈາກນີ້ ຍັງປ່ອຍໃຫ້ອົດຢາກ ໃຫ້ນຸ່ງແຕ່ເຄື່ອງນຸ່ງໂຕເກົ່າໆ ແລະຖືກຮ້າຍດ່າຕະຫຼອດ
ລູກຊາຍ ແລະລູກໃພ້ບອກວ່າ ເພາະແມ່ຕົນເອງປ່ວຍ ກັ້ນການຂັບຖ່າຍບໍ່ໄດ້ ເລີຍສ້າງພາລະໜັກໃຫ້ພວກເຂົາ ຈຶ່ງຕັດສິນໃຈຍ້າຍລາວໄປຢູ່ເຮືອນຄົວ ທີ່ເປັນຄອກແບບທີ່ເຫັນ
ທັງນີ້ ທາງເຈົ້າໜ້າທີ່ໄດ້ດຳເນີນການນຳຕົວລູກຊາຍ ແລະລູກໃພ້ ໄປສືບສວນ ເຊິ່ງທັງສອງຍັງບໍ່ຍອມຮັບຜິດ ແລະຈະໄດ້ດຳເນີນຄະດີຕໍ່ໄປ, ຈາກນັ້ນ ເຈົ້າໜ້າທີ່ທ້ອງຖິ່ນ ໄດ້ເຂົ້າຊ່ວຍເຫຼືອແມ່ເຖົ້າຄົນນັ້ນ ພາໄປອາບນໍ້າ ແລະປ່ຽນເຄື່ອງນຸ່ງ ແລ້ວສົ່ງຕົວໄປໂຮງໝໍ ເພື່ອກວດສຸຂະພາບ ເຊິ່ງຕອນນີ້ຢູ່ໃນການດູແລຂອງແພດແລ້ວ