ສຳນັກຂ່າວຣອຍເຕີ ລາຍງານເມື່ອວັນທີ 11​ ມັງກອນ 2017 ຜ່ານມາວ່າ ໄຂ່ໄກ່ທີ່ນໍາເຂົ້າຈາກສະຫະລັດອາເມລິກາ ຈຳນວນເກືອບ 3 ລ້ານໜ່ວຍຈະຖືກສົ່ງມາຮອດເກົາຫຼີໃຕ້ ໃນວັນເສົາ ທີ 14 ມັງກອນ 2017 ນີ້ ເພື່ອບັນເທົາບັນຫາຂາດໄຂ່ໄກ່ໃນປະເທດເກົາຫຼີໃຕ້ ເຊິ່ງເປັນຜົນມາຈາກການແຜ່ລະບາດຂອງໄຂ້ຫວັດສັດປີກ ຄັ້ງຮຸນແຮງທີ່ສຸດໃນເກົາຫຼີໃຕ້

ສຳລັບການຂົນໄຂ່ມາເກົາຫຼີໃຕ້ແມ່ນ ສາຍການບິນໂຄຮຽນແອ ແລະເອເຊຍນາແອໄລ ສອງສາຍການບິນແຫ່ງຊາດຂອງເກົາຫຼີໃຕ້ ຈະເປັນຜູ້ຂົນໄຂ່ຈາກສະຫະລັດອາເມລິກາເຂົ້າມາສາຍການບິນລະ 100 ​ໂຕນ ເຊິ່ງລວມເປັນໄຂ່ໄກ່ຈຳນວນ 2.98 ລ້ານໜ່ວຍ ເຊິ່ງເປັນໄຂ່ໄກ່ຈາກສະຫະລັດມາຫາເກົາຫຼີໃຕ້ຄັ້ງທຳອິດ ແລະເປັນການນຳເຂົ້າໄຂ່ໄກ່ສົດ ເປັນຄັ້ງທຳອິດຂອງເກົາຫຼີໃຕ້ ນັບແຕ່ປີ 1999 ເປັນຕົ້ນມາ

ໄຂ່ໄກ່ທີ່ນຳເຂົ້າຈາກສະຫະລັດທັງໝົດນີ້ ຈະຖືກຢາຍໄປຮ້ານຄ້າຕ່າງໆ ແລະຊຸບເປີມາເກັດທົ່ວໄປ ກ່ອນເທດສະການກຸດຈີນທີ່ກຳລັງຈະມາຮອດໃນທ້າຍເດືອນນີ້

ສຳລັບການນຳເຂົ້າໄຂ່ຄັ້ງນີ້ ມີຂຶ້ນຫຼັງລັດຖະບານເກົາຫຼີປະກາດມາດຕະການ ທີ່ຈະນຳເຂົ້າໄຂ່ໄກ່ຈາກຕ່າງປະເທດ ເພື່ອແກ້ໄຂບັນຫາຂາດແຄນໄຂ່ໄກ່ທີ່ເກີດຂຶ້ນ ເຊິ່ງລັດຖະບານຍັງຈະນຳເຂົ້າໄຂ່ໄກ່ເພີ່ມອີກຈຳນວນ 200 ໂຕນ ໃນຊ່ວງອາທິດໜ້າ